Qazaqstanda travmatıkalyq qarýǵa tyıym salynýy múmkin
ASTANA. 28 mamyr. QazAqparat - Aldaǵy ýaqytta travmatıkalyq qarýǵa tyıym salynýy múmkin. Bul týraly «Ekspert» klýbynyń «Qazaqstannyń quqyq qorǵaý júıesin jańǵyrtý» taqyrybyndaǵy otyrysynda Parlament Májilisiniń depýtaty Nurlan Ábdirov málim etti.
Onyń aıtýynsha, búginde osy máselege qatysty zań jobasy depýtattardyń talqylaýyna tústi. «Onda, birinshiden, travmatıkalyq, sondaı-aq gazdy qarý-jaraqqa tyıym salý qarastyrylǵan. Ekinshiden, onyń barlyǵyn adamnyń jeke qorǵanysy úshin qoldanylatyn qarýlardyń sanatynan shyǵarý josparlanyp otyr», - deıdi N.Ábdirov. Halyq qalaýlysy atap kórsetkendeı, «Qarý-jaraqtyń keıbir túrleriniń aınalymy týraly» zańda travmatıkalyq qarýdy halyqtan satyp alý tetigi bar. «Onymen quqyq qorǵaý organdary men kúzet qyzmetterin qamtamasyz etýge ábden bolady», - deıdi depýtat.
