Qazaqstanda tranzıttik áleýetti arttyratyn jańa avtomagıstraldar salynady

ASTANA. KAZINFORM — V Ulttyq quryltaıda qabyldanǵan sheshimder aıasynda Kólik mınıstrligi eldiń avtojol ınfraqurylymyn jańǵyrtý men tranzıttik áleýetin damytýǵa baǵyttalǵan Prezıdent tapsyrmalaryn oryndaýǵa kiristi, dep habarlaıdy vedomstvonyń baspasóz qyzmeti.

Qyzylorda — Jezqazǵan avtomobıl joly jobasyn iske asyrý aıasynda jalpy uzyndyǵy 400 shaqyrymdy quraıtyn joldyń Qyzylorda oblysy aýmaǵyndaǵy 192 shaqyrymynyń qurylysy aıaqtalyp, paıdalanýǵa berildi. Qalǵan 208 shaqyrymda qurylys-montaj jumystary jalǵasady. Atalǵan jolda 2026 jyldyń sońyna deıin kólik quraldary úshin qozǵalysty tolyq ashý josparlanǵan.

— 2026 jyldan bastap birqatar iri avtojol jobalaryn iske asyrý josparlanǵan. Atap aıtqanda, halyqaralyq «Batys Eýropa — Batys Qytaı» kólik dálizi boıyndaǵy Qyzylorda — Aqtóbe baǵytynda tórt jolaqty jańa avtomagıstral salynyp, sondaı-aq, Qaraǵandy — Jezqazǵan avtomobıl jolyn kezeń-kezeńimen tórt jolaqqa deıin keńeıte otyryp salý kózdelgen. Budan bólek, eldiń ońtústigindegi kólik aǵyndaryn azaıtý maqsatynda Saryaǵash qalasyn aınalyp ótetin jol salý jobasy júzege asyrylady. Atalǵan jobalardy iske asyrý «tolyq tsıkl» («pod klıých») qaǵıdaty boıynsha qarastyrylǵan, — delingen habarlamada.

Qazirgi kezeńde halyqaralyq qarjy uıymdarymen kelisimderge qatysty daıyndyq jumystary tolyq aıaqtaldy. Qazir konkýrs rásimderi ótkizilip jatyr, al qurylys-montaj jumystary 2026 jyldyń ekinshi jartysynda bastalady dep josparlanyp otyr.

Jalpy uzyndyǵy 500 shaqyrym joǵary bolatyn Beıneý — Sekseýil avtojoly jobasy erekshe baqylaýda. Búginde tehnıkalyq-ekonomıkalyq negizdeme daıyndalyp, memlekettik saraptamadan oń qorytyndy alynǵan. Barlyq rásim aıaqtalǵannan keıin jobany iske asyrý jumystary bastalmaq.

Avtojol jobalarynyń júzege asyrylýy Qazaqstan Respýblıkasy Kólik mınıstrliginiń qatań baqylaýynda.

Budan buryn Memleket basshysy júk tasymaldaıtyn áýe kompanııasyn qurý týraly tapsyrmasy durys oryndalmaı jatqanyn aıtyp, Úkimettiń sheshimin synady.