Qazaqstanda transulttyq kompanııalardyń 22 jobasy pysyqtalýda - IDM

ASTANA. QazAqparat - Transulttyq kompanııalardyń quny 9,2 mlrd dollarlyq 22 pysyqtalýda. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

Mınıstrdiń aıtýynsha, Memleket basshysynyń tapsyrmalaryn oryndaý maqsatynda «100 naqty qadam» - Ult jospary aıasynda mınıstrlik transulttyq kompanııalardy tartý jumystaryn belsendi túrde júrgizýde. Shamamen 10,6 mlrd dollar bolatyn 34 jobadan transulttyq kompanııa jobalarynyń tizimi jasaldy. Jalpy somasy 1,4 mlrd dollar bolatyn 12 joba iske asyrylý satysynda, 9,2 mlrd dollarlyq 22 joba pysyqtalýda.

«Qazirgi ýaqytta 3 deńgeıli ınvestıtsııa tartý júıesi quryldy: syrtqy deńgeıde - QR Syrtqy ister mınıstrligi, Qazaqstannyń sheteldegi mekemeleriniń ınvestıtsııalyq keńesshileri jáne «Kazakh Invest» ókilderi; ortalyq deńgeıde - Investıtsııalar jáne damý mınıstrliginiń Investıtsııalar jónindegi komıteti jáne «Kazakh Invest» Ulttyq kompanııasy AQ-y; óńirlik deńgeıde - jergilikti atqarýshy organdar, «Kazakh Invest» Ulttyq kompanııasy AQ-nyń aımaqtyq ókilderi», - dedi ol.

Jeńis Qasymbektiń dereginshe, sońǵy jyldary elimizde zańnamaǵa ózgerister engizip, ruqsat berý, salyq salý, kedendik baqylaý júıelerin, kóshi-qon vızalyq rejimin jeńildetildi. Sondaı-aq EYDU usynystaryna sáıkes sot júıesin jeńildetildi.

«Qazirgi ýaqytta iri ınvestorlardyń qatysýymen bolatyn ınvestıtsııalyq daýlar birinshi satydaǵy sot erejeleri boıynsha Joǵarǵy sotta, qalǵandary Astana qalasynyń sotynda qaralady. Olardy qaraý úshin Joǵarǵy sotta Astana qalasynyń mamandandyrylǵan sot alqasy quryldy. Problemalyq máselelerdi jedel sheshý maqsatynda ınvestorlardyń memlekettik organdarmen daýly máseleleri boıynsha múddelerin qorǵaıtyn ınvestıtsııalyq ombýdsmenniń ınstıtýty jumys isteıdi», - dedi mınıstr.