Qazaqstanda transplantologııa ortalyǵy qurylatyn bolady - A. Baıgenjın
ASTANA. 16 mamyr. QazAqparat /Qanat Mámetqazyuly/ - Qazaqstanda transplantologııa ortalyǵy qurylatyn bolady.
Bul týraly búgin QR Densaýlyq saqtaý vıtse-mınıstri Erik Baıjúnisovtiń tóraǵalyǵymen ótken mınıstrlik janyndaǵy Patsıentterdiń quqyǵyn qorǵaý jónindegi qoǵamdyq keńestiń otyrysynda «Ulttyq ǵylymı medıtsınalyq ortalyq» AQ bas dırektory Abaı Baıgenjın málim etti.
«Biz osy usynysty jasaǵan edik, qajetti qujattar da jınaqtaldy. Endigi kúni Ulttyq ǵylymı medıtsınalyq ortalyq bazasynda klınıka qurylysyna jer bólinip, tıisti qujattar alyndy», - deıdi A. Baıgenjın. Onyń aıtýynsha, Ortalyqta negizinen transplantatsııanyń Ulttyq bıýrosy qurylýy shart. Budan bólek, arnaıy zerthana ashý, óndiristik ınfraqurylymdy damytý qajet etiledi. Dári-dármektik qamtamasyz etý máseleleri de sheshimin tabýy tıis.
«Zańnamalyq bazany qamtamsyz etý jaıy da ózekti. Bul rette eń aldymen zańnamada dárigerlerdiń zańdyq qorǵanysyna baǵyttalǵan ózgerister engizilgeni lázim. Jurtshylyq arasynda aǵzaly donorlyqqa qatysty jaǵymsyz pikirdi seıiltý úshin nasıhattyq jumys júrgizilýi kerek», - dedi A. Baıgenjın.
