Qazaqstanda traktor óndirisi úsh esege ósse de, qajettiliktiń 90 paıyzyn ımport jaýyp otyr
ALMATY. QazAqparat - Qazaqstanda traktor óndirisi úsh esege ósken. Dese de, elge qajetti traktorlardyń 90 paıyzyn ımporttyq tehnıka jaýyp otyr, dep habarlaıdy QazAqparat tilshisi Energyprom aqparat kózine silteme jasap.
«Osy jyldyń qańtar-sáýir aılarynda aýyl jáne orman sharýashylyǵyna qajetti traktor óndirisi 3,3 paıyzǵa ósip, 215 danaǵa jetken. Salystyra keteıik: bir jyl elde tek 65 dana traktor óndirilgen edi. Bul kórsetkish 2017 jyldyń kórsetkishine qaraǵanda 52 paıyzǵa az», - delingen habarlamada.
Aýyl sharýashylyǵyna qoldanylatyn traktordyń kóbi ShQO-da shyǵarylyp jatyr. Semeıdegi «SemAz» JShS zaýyty eldegi traktorlardyń tórtten úsh bóligin óndirýde. Al qalǵan 25 paıyzy Qostanaı oblysyndaǵy «AgromashHoldıng KZ» AQ-na tıesili.
«AgromashHoldıng KZ» AQ - qazirgi ýaqytta ESSIL markaly astyq jınaıtyn kombaındy jáne keń assortımentte qosalqy bólshekterdi shyǵaratyn Qazaqstandaǵy birden-bir óndiristik kásiporyn ekenin atap ótý kerek. Sondaı-aq, kompanııa «Gomselmash» kompanııasynyń Qazaqstan aýmaǵyndaǵy birden-bir dıstrıbıýtory sanalady.
«Agromashholdıng KZ» AQ osy jyldyń mamyr aıynda Lovol kompanııasyndaǵy qytaılyq áriptesterimen Qostanaıda traktor óndirý boıynsha tseh ashty. «Agromashholdıng KZ» AQ dırektorynyń birinshi orynbasary Dınara Shúkejanova málim etkendeı, jobanyń quny - 1,6 mlrd teńge. Jylyna munda 3 myń traktor shyǵarý josparlanǵan.
«Traktordyń baǵasy bul jerde 2,5-14 mln teńge aralyǵynda bolady. Biz óndiristik quraý jumysy boıynsha kelisimge keldik. Ol jumys aıasynda jyl saıyn belgili bir shekteý deńgeıine jete bilýimiz kerek. Óndiris 5-6 jyl boıy iske qosylyp tursa, zaýytta kabınalar qurastyrylyp, tolyq boıaý, dánekerleý jumysy retke keltiriledi. Búginge deıin 100 traktor óndirilip, onyń 60-y «Qazagroqarjy» arqyly satylyp ketti. Kelesi jyly Reseıge, Tájikstan men Ózbekstanǵa traktorlardy eksporttaýdy kózdep otyrmyz», - deıdi Dınasha Shúkejanova.
Eske sala ketsek, ótken jyldyń alǵashqy toqsanynyń qorytyndysy boıynsha elimizde 1440 traktor satylyp, tórteýi ǵana eksportqa shyǵarylǵan bolatyn. Óndiris mólsheri úsh esege artqanymen, negizgi úles, ıaǵnı 90,6 paıyz - báribir ımporttyq tehnıkalarda qalyp otyr.
Foto: finance.tut.by
