Qazaqstanda toı jasaý qansha turady
ASTANA. KAZINFORM — Kazinform tilshisiniń habarlaýynsha, júz adamǵa arnalǵan banket ótetin qalasyna, zalǵa jáne toıdyń aýqymyna qaraı 650 myń teńge de, 10 mln teńge de bolýy múmkin.
Qazaqstandaǵy toı merekelik dastarqan ǵana emes, bul — otbasylyq jáne qoǵamdyq mádenıettiń bir bólshegi. Qıyn ýaqyttyń ózinde adamdar týǵan-týysty jınap, dastarqan jaıyp, qýnyshyn bólisýge tyrysady jáne oǵan et jaqyndaryn ǵana shaqyryp qoımaıdy. Sondyqtan qazaqstandyq toıdyń shaǵyn kólemde ótýi óte sırek. Úılený toıy, qudalyq, mereıtoı jáne súndet toıǵa keletinder sany júzden kem bolmaıdy.
Biraq salystyrý úshin biz shartty túrde 100 adam dep aldyq. Barlyq qaladaǵy banket zaldary bir adamǵa dep esepteıtindikten salystyrý qıyn bolǵan joq. Bul somaǵa ádette daıyn mázir usynady, oǵan birneshe salat, salqyn tiskebasar, taralǵan et ónimderi, jemis-jıdek, táttiler, sýsyndar men bir-eki ystyq taǵam kiredi. Biraq meıramhananyń ózi — toı shyǵynynyń bir bóligi ǵana. Asaba, án-bı, dybys, jaryq, LED-ekran, bezendirý, foto men vıdeo bólek esepteledi. Eger únemdese, mundaı qyzmet túrleri shamamen 200-500 myń teńge aralyǵynda bolady. Qalasańyz, merekeni kınodadaǵydaı etip ótkize alasyz, al bul bankettiń baǵasynan asyp túsýi múmkin.
Shymkentte eń arzan toıdyń ózi qaltańyzdy qaǵyp túsedi. Eger banket mázirin ǵana eseptese, 100 adamdyq toıdyń quny 2-3 mln-ǵa deıin barady. Ataqty ári qymbat zańdarda bul soma 6 mln-ǵa deıin jetýi múmkin. Eger oǵan toı júrgizýshini, artısterdi, bezendirýdi, foto, vıdeo, án men qural-jabdyqty jalǵa alý qunyn qossańyz, toıdy jaqsy atqaryp shyǵýǵa kemi 6-10 mln teńge kerek.
Almatyda jaǵdaı sál ózgeshe. Megapolısten qalaýyńyzǵa qaraı 100 adamǵa arnalǵan banketti 1,2 mln teńgege ótkize alasyz. Barynsha qaltaǵa qonymdy baǵa bir adam úshin 22 myń teńge shamasynda. Eger oǵan qosymsha shyǵyndardy qossaq, eń arzan toı 1,5-2,5 mln teńge bolady. Almatyda toı qunynyń joǵarǵy shegi joq deýge bolady. Qymbat meıramhanany, keńeıtilgen mázir men qyzmet túrleriniń tolyq toptamasyn qalasańyz, baǵa 6 mln teńgege barady. Mundaı jaǵdaıda bir adam úshin 50 myń teńge nemese odan joǵary tóleýge týra keledi.
El ordasynda da baǵa osy shamada. Astananyń banket zaldary adam basyna shamamen 15 myń teńgeden bastap 55 myń teńgege deıin suraıdy. Buǵan asaba, apparatýra, fotograf, bezendirý men ózge de qyzmet túrlerin qosqanda taǵy kem degende 200-500 myń teńge kerek. Sondyqtan eń tıimdi baǵa shamamen 1,7 mln teńgeden bastalyp, 6 mln teńgege deıin barady.
Úsh megapolısten keıin baǵa birden tómendeıdi, degenmen, bárinde birkelki emes.
Óskemende qarapaıym banket zaldary adam basyna 12 myń teńge suraıdy, al óte qymbaty — 30 myń teńge. Barlyq baǵdarlamany qosa eseptegende toı shyǵyny 1,5 mln teńgeden kem túspeıdi, ortasha shyǵyn 3,5 mln teńge shamasynda.
Tarazda toı ótkizý baǵasy óńirlerdegi ortasha deńgeıge jaqyn. Eger óte úlken ári qymbat emes banket zaldaryna júginseńiz, 100 adamǵa arnalǵan toıdy 1,2 mln teńgege ótkizýge bolady. Deńgeıi odan joǵary toıhanalarǵa adam basyna 25-30 myń teńgeden shyǵyndalasyz. Onda qosymsha shyǵyndarmen birge qorytyndy shyǵyn kem degende 3,5 mln teńgege jetedi.
Petropavl bazalyq baǵa jóninen qoljetimdi óńir sanalady. Munda qarapaıym toıdy shamamen 1,4 mln teńgege ótkizesiz. Bul tek dastarqan úshin, oǵan tiskebasar, salat pen eki ystyq tamaq kiredi. Joǵary baǵa 25 myń teńgege deıin barady, ıaǵnı 100 adamdyq banket kemi 2,5 mln teńge bolady. Eń qymbat meıramhanalardyń ózinde keıbir qyzmet túrleri men mázirdegi jekelegen taǵamdar úshin bólek aqy eseptelýi múmkin. Mysaly, sháı, et, araq-sharap, sondaı-aq qosymsha qyzmet únemi bazalyq kórsetkishke kire bermeıdi.
Elimizdiń batys óńirinde baǵa saıasaty ártúrli deńgeıde.
Aqtóbede mázir adam basyna 8 myń teńgeden bastalyp, 30 myń teńgege deıin barady. Alaıda munda oǵan kóbine apparatýra, dybys, jaryqpen bezendirý, kilem joly men LED-ekran qosylady. Asaba úshin bólek tóleısiz.
Eń tómengi shek Atyraýda sııaqty. Eń arzany 8 myń teńgeden bastalady, qalaýyńyzǵa qaraı ol baǵa jan basyna eseptegende 25 myń teńgege jetýi múmkin. Alaıda buǵan as mázirinen basqa eshteńe kirmeıdi. Qosymsha shyǵyndardy qosqanda 100 adam úshin 1-3 mln teńge shyǵyndalýǵa týra keledi.
Qostanaıda baǵa aıyrmashylyǵy asa joǵary emes, biraq buǵan qarap arzan qala deı almaısyz. Adam basyna eń únemdi baǵa — 10-12 myń teńge. Odan joǵarysy 18-20 myń teńgege deıin jetedi, alaıda áńgime tek as máziri týraly. Toı júrgizýshisin, shoý-baǵdarlamany, qural-jabdyq pen basqasyn qosyp, qýanyshyńyzdy eseleý úshin taǵy kemi 500 myń teńge shyǵyndalasyz. Belgili júrgizýshiler, agenttikter, árıne, odan da kóp suraýy ǵajap emes.
Qaraǵandy men Jezqazǵanda eń tómen baǵa 100 adam úshin 1 mln teńgege barady. Eger tanymal meıramhana tańdap, qosymsha qyzmetti qossańyz, baǵa 2,5 mln teńgeden bir-aq shyǵady. Toıdyń búkil shyǵynyn meıramhana kótergen jaǵdaıda adam basyna 15-20 myń teńge suraıdy. Nátıjesinde daıyn banket 100 adam úshin 2 mln teńge bolady.
Qyzylordada bir adam úshin eń árisi — 20 myń teńge. Degenmen, odan da arzan toıhana tabýǵa bolady, al baǵa 8 myń teńge shamasynda. Qosymsha qyzmet pen qyzmet kórsetýshiniń quny asa qymbat emes. Sondyqtan toıdyń jalpy quny 1-2,5 mln teńge aralyǵynda.
Qostanaı baǵa jóninen Almatyǵa jaqyn. Tipti qaltaǵa qonymdy degen 100 adamdyq toıdy 1-1,4 mln teńgege ótkizesiz. Toıhana odan qymbat ári as máziri aýqymdy bolsa, baǵa 2,3 mln teńgege jaqyndaıdy.
Túrkistanda, kerisinshe, únemdeýge múmkindik zor. Qalada adam basyna 6500 teńge alatyn banket zaldary tabylady. Qosymsha shyǵyndardy qosqanda 1 mln teńgege toı ótkize alasyz. Aqshanyń betine qaramaı toı ótkizemin deseńiz, 2,3 mln teńge tóleısiz, ol keńeıtilgen mázir men baǵdarlamany qamtıdy.
Aqtaýda 100 adam úshin toı 1-2,3 mln teńge shamasynda. Biraq baǵa aıyrmashylyǵy Túrkistandaǵydaı úlken emes. Eń qymbat toıhanalar alań, mázir jáne qyzmet kólemimen erekshelenedi. Baǵasynda aıtarlyqtaı aıyrmashylyq baıqalmaıdy.
Pavlodar as máziriniń ǵana emes, qosymsha qyzmet aqysymen de qyzyq kórindi. Qaltaǵa qonymdy baǵa adam basyna 10-12 myń teńgeden, odan qymbaty 16 myń teńgege deıin. Tipti arzanyn izdeseńiz, 8 myń teńgege tabýǵa bolady. Nátıjesinde 100 adamdy shaqyryp, 1,2-2 mln teńge qaldyrasyz. Apparatýra, jaryq, LED-ekran men asaba Almaty men Astanaǵa qaraǵanda eki ese arzan. Keıde oǵan toı-dýmandy tikeleı translıatsııalaý qyzmetin qosýǵa daıyn. Sóıtip, apparatýra paketi shamamen 200 myń teńge bolady.
Taldyqorǵan 8-10 myń teńgege táýir zaldaryn usynady. Odan qymbat alańdar eki ese shyǵyn. Sondyqtan qoljetimdi toı baǵasy 1-2 mln teńge aralyǵynda qubylady.
Osyǵan uqsas kórinis Kókshetaýda da baıqalady. Munda eń qymbat usynystyń ózi barynsha arzan. Degenmen, qyzmet kórsetýshi men qosymsha qyzmet aqysyn qosqanda shamalas.
Semeı baǵa tıimdiligi jóninen eń qoljetimdi qala kórindi. Munda adam basyna 4,5 myń teńge alatyn banket zaldary da bar eken. Tipti 100 adamdy 650 myń teńgege shaqyrýǵa bolady. Áıtse de, sán-saltanaty kelisken banketter men qymbat usynystar da bar, olardyń baǵasy shamamen 2,2 mln teńgeden bastalady.
Odan tómen bastapqy baǵa Oralda baıqaldy. Jergilikti turǵyndar adam basyna 3,5 myń teńge tóleýge bolatyn banket zaldaryn taba alady. Odan árisi 6 myń teńge bolady. Qymbat meıramhanalar 10-15 myń teńge suraıdy. Osylaısha 100 adamdy 700 myń-2,2 mln teńgege kúte alasyz. Bul jerde eskeretin bir jáıt, zaldy jaldaý aqysy qosymsha shyǵynnan bólek esepteledi.
Biz buǵan deıin Qazaqstanda jeldetkish qansha turatynyn, sondaı-aq kvas, gazdalǵan sýsyn men aýyzsýdyń baǵasyn jazǵanbyz.
