Qazaqstanda tótenshe jaǵdaılarǵa arnalǵan SMS-járdem nómiri iske qosyldy
ALMATY. QazAqparat - Qazaqstanda tabıǵı apattar kezinde zardap shekkenderge gýmanıtarlyq kómek kórsetýge arnalǵan qysqa SMS-járdem nómiri iske qosyldy, dep habarlady QazAqparat.
Atalǵan jobany «Ksell» kompanııasy «Qyzyl jarty aı» uıymymen birlesip júzege asyrýda.
Endi «Ksell» jáne «Aktıv» abonentteri zardap shekkenderge 9777 nómiri arqyly kez kelgen mátindegi habarlama jibere alady. Bir SMS quny: 200 teńge.
Jınalǵan járdem «Qyzyl jarty aı» uıymynyń baqylýynda bolady.
«Bizge kóp jaǵdaıda, ásirese, Qaraǵandydaǵy sý jaıylý, Almatydaǵy sel kóshkini oqıǵalary kezinde adamdar kelip, zardap shekkenderge qalaı qol ushyn sozýǵa bolatynyn surady. Endi járdemdesý jeńil boldy. Budan bylaı qazaqstandyqtar otandastaryna járdemdesý úshin kez kelgen ýaqytta habarlama joldap, kómektese alady», - dedi «Qyzyl jarty aı Qazaqstan» qoǵamdyq birlestiginiń bas dırektory Elena Kım.
