Qazaqstanda tótenshe jaǵdaılar salasyndaǵy zańdardyń ornyn «Azamattyq qorǵaý» týraly biryńǵaı zań jobasy almastyrmaq
TANA. 17 tamyz. QazAqparat /Gúlmıra Alıakparova/ - Qazaqstannyń Tótenshe jaǵdaılar mınıstrligi tótenshe jaǵdaılar salasyndaǵy alty zańdy biriktirip, «Azamattyq qorǵaý» týraly biryńǵaı zań jobasyn ázirlep jatyr.
«Búgingi kúni QR Tótenshe jaǵdaılar mınıstrligi «Azamattyq qorǵaý» týraly biriktirilgen zań jobasyn ázirlep jatyr. Ol Qazaqstan Respýblıkasyndaǵy tótenshe jaǵdaılar salasyndaǵy alty zańdy biriktiretin bolady. Zań jobasyn ázirleý qazirgi zamanǵy qaýipter men tótenshe jaǵdaılarǵa qarsy kúresti kúsheıtý qajettiliginen týyndap otyr. Búgingi kúni zań jobasy 17 memlekettik organnyń maquldaýyn aldy. Aldaǵy qyrkúıek aıynda Úkimetke joldanatyn bolady», - dep atap ótti búgin Astanada ótken «Tótenshe jaǵdaı kezinde basqarý salasyndaǵy zańnamalyq bazany nyǵaıtý» atty óńirlik konferentsııa barysynda jýrnalısterge bergen suhbatynda QR TJM Quqyqtyq qamtamasyz etý departamenti zań basqarmasynyń bastyǵy Tımýr Jantemirov.
T.Jantemirovtyń aıtýynsha, «Azamattyq qorǵaý» týraly zańy - «Tótenshe jaǵdaılar týraly», «Memlekettik materıaldyq rezerv týraly», «Qaýipti óndiristik nysandardaǵy ónerkásiptik qaýipsizdik týraly» «Órt qaýipsizdigi týraly», «Obektiler ıeleriniń azamattyq-quqyqtyq jaýapkershiligin mindetti saqtandyrý týraly», «
Halyq densaýlyǵy jáne densaýlyq saqtaý júıesi týraly» QR Zańdaryn biriktiretin bolady jáne onda quzyrly organdardyń mindetteri men jaýapkershilikter aıqyn jazyp-kórsetiledi.
«Atalmysh zańnamalyq qujattar 1996 jyly ázirlengen. Al búgingi kúni qazirgi zamanǵy qaýip-qaterler tótenshe jaǵdaılarǵa qarsy áreket etýdi jetildirýdi jáne jańartýdy qajet etip otyr», - deıdi ol.
Onymen birge, ulttyq zań jobasyna Ortalyq Azııada alǵash ret Qyzyl aı jáne Qyzyl jarty aı qoǵamy týraly jeke bap engizilip otyr.
Vedomstvo ókiliniń sózine súıensek, «Azamattyq qorǵaý týraly» zań jobasy búgingi kúni Reseı Federatsııasynda ázirlený ústinde.
