Qazaqstanda tótenshe jaǵdaıdan zardap shekken azamattarǵa turǵyn úı berý qaǵıdalary jańartyldy

ASTANA. KAZINFORM – Qazaqstanda tótenshe jaǵdaı saldarynan turǵyn úısiz qalǵan azamattarǵa turǵyn úı berý tártibi jańartyldy. Bul týraly Indýstrııa jáne qurylys mınıstrliginiń bıyl 4 qarashadaǵy buıryǵynda jazylǵan.

Jańa qaǵıdalarǵa sáıkes, tótenshe jaǵdaı saldarynan baspanasynan aıyrylǵan azamattar tótenshe jaǵdaı bolǵan óńirdiń jergilikti atqarýshy organyna júginip, kelesi qujattardy tapsyrýy qajet:

- jeke basyn kýálandyratyn qujattyń kóshirmesi;
- jyljymaıtyn múlik ıesiniń nemese senimhat boıynsha ókiliniń ótinishi;
- turǵyn úı nysanynyń kadastrlyq pasporty;
- jer ýchaskesine quqyq belgileıtin qujat (jeke menshik quqyǵyn rastaıtyn akt);
- «Azamattarǵa arnalǵan úkimet» memlekettik korporatsııasy bergen jyljymaıtyn múliktiń bar-joǵy týraly anyqtama.

Sonymen qatar eger zardap shekken azamattarda turǵyn úıdiń zańdy menshik ıesi ekenin dáleldeıtin qujat bolmasa, olardyń turǵyn úıge ıelik etý deregi «Qazaqstan ǵarysh sapary» ulttyq kompanııasynyń málimetterimen, sondaı-aq áleýmettik qorǵaý, ishki ister, densaýlyq saqtaý jáne bilim berý organdarynyń nemese kommýnaldyq qyzmet tólemderi týraly derektermen rastalýy múmkin.

Tótenshe jaǵdaıdan zardap shekken turǵyn úıdiń tehnıkalyq jaǵdaıyn tekserý ǵımarattar men qurylystardyń senimdiligi men turaqtylyǵyn tehnıkalyq zertteý qaǵıdalaryna sáıkes júrgiziledi. Bul jumystar jergilikti bıýdjet qarajaty esebinen qarjylandyrylady.

Turǵyn úısiz qalǵan jáne turǵyn úıge muqtaj azamattardyń tizimi olardyń ótinishteri negizinde qalyptastyrylady. Ótinishter tótenshe jaǵdaı jarııalanǵan kúnnen bastap eki aı ishinde qabyldanady. Qalyptastyrylǵan tizimder jergilikti atqarýshy organnyń ınternet-resýrsynda jáne óńirlik buqaralyq aqparat quraldarynda aıyna keminde eki ret jarııalanyp otyrady.

Sondaı -aq tizimder tolyq jasaqtalǵan soń eki kúntizbelik kún ótkennen keıin turǵyn úımen qamtamasyz etý jónindegi komıssııa qurylady. Komıssııa bes jumys kúni ishinde turǵyn úıdi memlekettik turǵyn úı qorynan berý nemese jazbasha túrde dáleldi bas tartý týraly sheshim qabyldaıdy.

Memlekettik turǵyn úı qorynan turǵyn úı berýden bas tartý negizderi retinde qujattardyń bolmaýy nemese jalǵan aqparattyń usynylýy kórsetilgen.

Tıptik jobalar boıynsha turǵyn úılerdiń qurylysy men satyp alynýy bıýdjet jáne bıýdjetten tys qarajat esebinen júzege asyrylady. Eger turǵyn úıdiń quny nemese aýdany bekitilgen tıptik jobadan asyp ketse, artyq soma bıýdjetten tys kózder esebinen qarjylandyrylady.

Sonymen qatar tótenshe jaǵdaıdan zardap shekken azamattarǵa komıssııa belgilegen eldi mekenderde óz betimen turǵyn úı izdeýge ruqsat etiledi. Mundaı turǵyn úıdi jergilikti atqarýshy organ satyp alyp, zańnamaǵa sáıkes zardap shekken azamatqa beredi. Satyp alynatyn turǵyn úıdiń quny bekitilgen tıptik joba qunynan aspaýy tıis.

Turǵyn úı alǵan azamattardyń tizimi komıssııa sheshim qabyldaǵan kúnnen bastap on kúntizbelik kún ishinde jergilikti atqarýshy organnyń ınternet-resýrsynda jáne óńirlik BAQ-ta jarııalanady.

Buıryq 2025 jylǵy 18 qarashadan bastap kúshine enedi. 

Eske sala keteıik, elimizde memlekettik turǵyn úıge muqtaj azamattardy esepke qoıý jáne baspana berý tártibi jańartyldy.