Qazaqstanda tótenshe jaǵdaı rejımi qaıtadan engizilýi múmkin be

NUR-SULTAN. QazAqparat – Qatań karantındik sharalardy engizbeımiz degen úmittemin. Densaýlyq saqtaý mınıstri Alekseı Tsoı osylaı aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda aldaǵy ýaqytta elimizde tótenshe jaǵdaı rejımin engizý múmkindigine qatysty suraq qoıyldy.

«Barlyǵy epıdemıologııalyq jaǵdaıǵa baılanysty. Osyndaı sheshim qabyldaý qajet bolsa, tıisti qadamdar jasalatyny anyq. Degenmen, qazir Qazaqstanda qalyptasqan turaqtylyqty tıisti qyzmetterdiń jumysy arqasynda saqtap qalamyz dep úmittenemiz. Sonymen qatar, ár azamat maska taǵyp, araqashyqtyqty saqtap, buqaralyq sharalardy uıymdastyrmaı halyqty qorǵaý baǵytyndaǵy sharalarǵa atsalysady dep oılaımyz. Bul talaptardy oryndasaq, karantınsiz ári shekteý sharalarynsyz indetti eńseremiz degen senim bar», - dedi mınıstr.

Budan buryn habarlanǵandaı, Qazaqstan birneshe elmen aradaǵy áýe reısterin qysqartpaq.

Sońǵy úsh aptada elordada karantın talaby jıi buzylǵan.