Qazaqstanda tórtinshi zaýytty salýdyń ornyna Shymkenttegi munaı zaýyty keńeıtilýi múmkin
ASTANA. QazAqparat - Qazaqstanda tórtinshi zaýytty salýdyń ornyna Shymkenttegi munaı zaýyty keńeıtilýi múmkin. Bul týraly búgin Astanada «Kazenergy» qaýymdastyǵynyń 2013 jyl boıynsha Ulttyq energetıkalyq baıandamasyn tanystyrý barysynda atalǵan qaýymdastyqtyń bas dırektory Áset Maǵaýov málim etti.
«Janarmaı baǵasyn ósirý sheshimi ózekti boldy. Biraq bul sheshim Reseıden joǵary oktandy benzınniń qajetti kólemi budan ary qaraı tasymaldanýyn ekonomıkalyq yntalandyrady», - dedi ol.
Á. Maǵaýovtyń paıymynsha, benzınniń jetispeıtin kólemin syrttan tasymaldaý elimizdegi munaı óńdeý zaýyttaryn jańǵyrtý aıaqtalǵansha jalǵasady.
«Álemdegi úrdiske toqtalatyn bolsaq, shaǵyn munaı óńdeý zaýyttary básekege qabiletti emes, ıaǵnı 5 mln. tonnaǵa deıingi zaýyttardy japqan durys. Sondyqtan elimizde 1-2 mln. tonna munaı ónimderi jetispeı turǵan kezde tórtinshi munaı óńdeý zaýytyn salý ekonomıkalyq turǵyda tıimsiz. Atap aıtqanda, biz munaı óńdeý qýatyn 18 mln. tonnaǵa deıin arttyryp jatyrmyz, sondaı-aq ashyq tústi munaı ónimderdi shyǵarý qamtamasyz etiledi. Osy oraıda ortamerzimdi bolashaqta barlyq qajettilikti Qazaqstandaǵy úsh zaýyttyń esebinen jabatyn bolamyz (munaı óńdeý zaýyttary jańǵyrtylǵannan keıin). Alaıda, boljam boıynsha 2024-2025 jylǵa qaraı munaı ónimderin tutyný kólemi artatyn bolady», - dedi ol.
Bul turǵyda Á. Maǵaýov elimizdegi úsh zaýyttyń birin keńeıtý áleýeti bar ekendigin atap ótti.
«Meniń oıymsha, Shymkent munaı óńdeý zaýytyna ekpin qoıylyp otyr jáne qýattylyǵy budan ary qaraı keńeıtilmek. Keńestik kezeńde bul zaýytty iri óndiris alańyna aınaldyrý jospary eskerilgen bolatyn. Qazirgi kezde ulttyq kompanııa osy zaýyttyń bazasynda qandaı áleýetti kólemde arttyrý kerektigi jónindegi máseleni zertteýde», - dep túıdi ol.
