Qazaqstanda tórt sheteldik ınvestor quny 1,1 mlrd dollar bolatyn jobalardy júzege asyrýda

NUR-SULTAN. QazAqparat – Qazaqstanda 4 sheteldik ınvestor quny 1,1 mlrd dollar bolatyn jobalardy júzege asyrýda. Bul jaıynda «KAZAKH INVEST» UK» AQ basqarmasynyń tóraǵasy Meıirjan Júsipov málim etti, dep habarlaıdy QazAqparat tilshisi.

«Búgingi tańda KAZAKH INVEST ınvestıtsııalyq jobalar pýlyna jalpy quny 72,5 mlrd AQSh dollar bolatyn, 60 myńnan astam turaqty jumys oryndaryn qurýdy kózdeıtin 471 joba kiredi. Onyń ishinde 115 joba iske asyryldy jáne ınvestıtsııadan keıingi monıtorıng satysynda tur. Al 132 joba iske asyrý satysyna shyǵarylsa, 55 joba pysyqtalyp jatyr. Budan basqa 169 jańa ınvestıtsııalyq usynys ázirlendi», - dedi ol ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, iske asyrylyp jatqan jobalardyń ishinde óndeý salasyndaǵy birqatar mańyzdy joba bar.

Onyń qatarynda túriktiń Yildirim holdıngi Jambyl oblysynda iske asyryp jatqan quny 325 mln AQSh dollaryn quraıtyn kaltsıılengen soda shyǵarý zaýytyn, Aqmola oblysynda ıspannyń TSK kompanııasy somasy 110 mln AQSh dollary bolatyn et óndeý kásipornyn ataýǵa bolady.

«Sondaı-aq Almaty oblysynda arab ınvestorlary quny 82 mln AQSh dollardy quraıtyn jemis óndeý zaýyty men qoıma salmaq. Al Tehnonıkol jáne Eko-Kýltýra kompanııalarynyń reseılik ınvestorlary oqshaýlaǵysh materıal shyǵaratyn zaýytty jáne elimizde teńdesi joq jalpy aýmaǵy 500 gektar jylyjaı keshenin salýdy bastaǵaly otyr. Bul jobalardyń jalpy somasy - 1,1 mlrd AQSh dollary», - dedi Meıirjan Júsipov.