Qazaqstanda tórt myńnan astam adam aǵza transplantatsııasyn kútip júr

ALMATY. KAZINFORM – Elimiz boıynsha 4 myńnan astam adam transplantatsııa kezeginde turdy. Onyń ishinde 3723 naýqas búırekke muqtaj. Bul týraly óńirlik kommýnıkatsııalar qyzmetinde ótken baspasóz máslıhatynda A. Syzǵanov atyndaǵy Ulttyq ǵylymı hırýrgııa ortalyǵy tóraǵasynyń orynbasary Shoqan Qanıev málim etti.

Spıkerdiń sózinshe, 2024 jyly Qazaqstanda ishki organdardy aýystyrý boıynsha 250 operatsııa jasaldy. Bul – bir jyl burynǵymen salystyrǵanda edáýir kóp. Máselen, 2023 jyly mundaı 200 operatsııa júrgizilgen. Olardyń basym bóligi tiri donordan alynǵan.

– 227 otada naýqastarǵa týystary donor bolsa, 23 jaǵdaıda qaıtys bolǵandardyń organdary paıdalanyldy. Elimiz boıynsha 4 myńnan astam adam transplantatsııa kezeginde tur. Olardyń kóbi – búırekke muqtaj (shamamen 3723 adam), onyń ishinde 80-i – bala. Budan bólek, 100-ge jýyq bala búırekke, baýyrǵa jáne júrekke muqtaj, – deıdi ol.

Aıtýynsha, Almatyda sońǵy eki jylda eki kúrdeli operatsııa sátti ótti. Mysaly, 23 jastaǵy naýqasqa 53 jastaǵy áıeldiń júregi salyndy. Al 2025 jyldyń sáýir aıynda A.N. Syzǵanov atyndaǵy Ulttyq hırýrgııa ortalyǵynyń mamandary alǵash ret úsh búırekti qatar aýystyrý otasyn jasady. 

– 2021 jyldan beri bul júıe elimizde kelisim arqyly júzege asyp jatqanyna qaramastan, nebári 6,5 myń adam ǵana qaıtys bolǵannan keıin donor bolýǵa kelisim bergen. Al 90 myńnan astam adam bas tartqan. Qoǵamda qorqynysh, kúmán kóp. Keıbir nanym-senimniń de áseri bar. Adamnyń mıy ólip, júregi toqtaǵanda ǵana donor bola alady jáne ol arnaıy komıssııanyń baqylaýymen júzege asady – muny áli de túsinbeıtinder bar, – deıdi Shoqan Qanıev.

Qazaqstanda jeti transplantatsııa ortalyǵy jumys isteıdi. Onyń úsheýi Astanada, bireýi Almatyda, qalǵandary Shymkentte, Aqtóbede jáne Túrkistanda ornalasqan. 

– Myńdaǵan adamnyń ómirine arasha túsý úshin donorlar bazasyn ulǵaıtýymyz kerek. Ol úshin ár azamat bul iske jaýapkershilikpen qarap, qaıtys bolǵannan keıin donor bolýǵa kelisim berýi tıis. Osy arqyly siz bireýdiń ómirin qutqaryp, onyń ómirin uzarta alasyz, – dep tolyqtyrdy Shoqan Qanıev.

Osyǵan deıin transplantologııaǵa muqtaj jandardyń tizimi otanyń kóptiginen emes, donordyń joqtyǵynan qysqaryp jatqany týraly jazǵanbyz. 

Eske salaıyq, Almaty oblysynda qaıtys bolǵan donor 4 adamnyń ómirin saqtap qaldy.