Qazaqstanda tórt kúndik jumys aptasyna kóshý erterek - QR Ulttyq ekonomıka mınıstri
ASTANA. QazAqparat - Qazaqstanda tórt kúndik jumys aptasyna kóshý erterek. Bul týraly búgin Ortalyq kommýnıkatsııalar qyzmetindegi brıfıngte QR Ulttyq ekonomıka mınıstri Erbolat Dosaev málim etti.
«Meniń oıymsha, damyp kele jatqan memleket retinde tórt kúndik jumys aptasyna kóshý áli erterek. Sondyqtan da biz eńbek týraly Kodekske jáne zańǵa sáıkes, sondaı-aq bizde bekitilgen segiz saǵattan bes jumys kúni ýaqytymen jyljıtyn bolamyz. Bul tek memlekettik organdarǵa ǵana emes, sonymen qatar jeke kompanııalar úshin de ońtaıly ýaqyt dep sanaımyn»,-dedi mınıstr.
Budan buryn habarlanǵandaı, Halyqaralyq eńbek uıymynyń sarapshylary bes kúndikten góri tórt kúndik jumys aptasy anaǵurlym qolaıly dep sanaıdy jáne eńbek etýdiń osy rejimine kóshýdi usyndy.
Halyqaralyq eńbek uıymynyń sarapshylary jumys aptasyn qysqartýdyń paıdasyna óz dálelderin keltiredi.
Birinshiden, bul halyqtyń densaýlyǵyn túzetýge múmkindik beredi, óıtkeni qazirgi zamanda kóptegen aýrýlar jumys ýaqytyn únemi keńsede ótkizip, kúızeliske shaldyǵý sebebinen bolyp otyr. Ekinshiden, qysqa apta kóbirek jumys oryndaryn ashýǵa múmkindik beredi.
Úshnshiden, ártúrli zertteýler adamdar az jumys jasasa, neǵurlym ónimdi eńbek etetinin kórsetýde. Al keńsede uazq saǵattar boıy jumys jasaǵandar kóbine qaýyrt qyzmet istegendeı bolyp kórinedi. Al endi taǵy bir zertteýlerde aptanyń tórt kúninde ǵana jumys jasaǵan adamdar ózderin baqytty, ómirge qanaǵattanǵan kúıde sezinedi.
Endi aqyrynda, qazirgi zamandaǵy eń dáleldi ýáj: jumys aptasynyń bir kúninen bas tartý qorshaǵan ortaǵa da oń áser etedi, adamdardyń jumysqa barý-kelýi aptasyna birneshe mıllıardqa azaıady.
