Qazaqstanda tórt kollektorlyq agenttik lıtsenzııasynan aıyryldy
ASTANA. KAZINFORM — Qazaqstanda boryshkerlermen jumys isteý kezinde zań talaptaryn júıeli túrde buzǵan tórt kollektorlyq agenttik tizilimnen shyǵaryldy. Endi bul kompanııalar kollektorlyq qyzmet kórsete almaıdy. Bul týraly Qarjy naryǵyn retteý jáne damytý agenttigi habarlady.
Agenttik qarjylyq qyzmetterdi tutynýshylardyń quqyqtary men zańdy múddelerin qorǵaýǵa baǵyttalǵan qadaǵalaý qyzmetiniń sheńberinde kollektorlyq agenttikterdiń qyzmetine tekserýler júrgizgen.
Nátıjesinde boryshkerlermen jáne (nemese) úshinshi tulǵalarmen ózara is- qımyl jasaý kezinde josyqsyz áreketter jasaýdyń júıeli (qatarynan kúntizbelik 12 aı ishinde úsh jáne odan da kóp ret) faktileri anyqtaldy. Osyǵan baılanysty zańnamaǵa sáıkes Agenttiktiń 2026 jylǵy 16 qarashadaǵy buıryqtary negizinde tómendegiler kollektorlyq agenttikter tiziliminen alyp tastaldy:
- «Seven» kollektorlyq agenttigi» JShS (№ 6 buıryq);
- «iCollect» kollektorlyq agenttigi» JShS (№ 78 buıryq);
- «Kaz Invest Kollekshn» kollektorlyq agenttigi» JShS (№ 7 buıryq);
- «Tabys» kollektorlyq agenttigi» JShS (№ 43 buıryq).
Tizilimnen shyǵarý kórsetilgen uıymdardy kollektorlyq qyzmetti júzege asyrý quqyǵynan aıyrady.
Atalǵan kompanııalar:
— tizilimnen shyǵarý týraly habarlamany alǵan kúnnen bastap kúntizbelik
5 kún ishinde bul týraly tıisti kredıtorlardy, boryshkerler men senimgerlik basqarý sharttary jasalǵan adamdardy habardar etýge;
— habarlamany alǵan kúnnen keıin kúntizbelik 30 kún ishinde óz ataýynan «kollektorlyq agenttik» degen sózder men olardan týyndaıtyn, kollektorlyq qyzmetti júzege asyrýdy bildiretin sózderdi alyp tastaý arqyly qaıta tirkeý rásimin júrgizýge mindetti.
— Bul rette kollektorlyq agenttikti tizilimnen shyǵarý boryshkerlerdi banktik qaryz sharttary nemese mıkrokredıt berý týraly sharttar boıynsha mindettemelerdi oryndaýdan bosatpaıdy, — dep eskertti agenttikten.
Qarjylyq qyzmetterdi tutynýshylardyń quqyqtary men zańdy múddelerin qorǵaý qadaǵalaý qyzmetiniń negizgi basymdyqtarynyń biri bolyp tabylady. Agenttik kollektorlyq qyzmetter naryǵynda josyqsyz praktıkalardy anyqtaý, jolyn kesý jáne aldyn alý jóninde dáıekti sharalar qabyldaıdy. Boryshkerlerdiń quqyqtaryn saqtaýǵa jáne bereshekti óndirip alýdyń zańsyz ádisterine jol bermeýge erekshe nazar aýdarylady.
Agenttik buzýshylyqtarǵa ýaqtyly den qoıýdy jáne zańdarda kózdelgen yqpal etý sharalary men sanktsııalardy qoldanýdy qamtamasyz ete otyryp, kollektorlyq agenttikterdiń qyzmetine táýekelge baǵdarlanǵan qadaǵalaýdy júzege asyrýdy jalǵastyratyn bolady.
Eske sala keteıik, buǵan deıin elimizde jeti mıkroqarjy uıymy lıtsenzııasynan aıyrylǵan bolatyn.