Qazaqstanda tórt eldiń áskerı barlaýshylary arasynda jarys ótip jatyr

ASTANA. QazAqparat - Búgin «Astana» óńirlik qolbasshylyǵy «Spassk» oqý ortalyǵynyń bazasynda «Altyn Úki-2017» barlaý bólimsheleriniń 9-shy halyqaralyq jarysy bastaldy, dep habarlaıdy QR Qorǵanys mınıstrliginiń baspasóz qyzmeti .

Bes kún ishinde Belarýs, Qazaqstan, Pákistan jáne Reseıdiń 8 komandasy úzdik barlaý tobyn anyqtaıdy.
«Altyn Úki-2017» halyqaralyq jarysy oǵan qatysýshylardyń is júzindegi jaýyngerlik is-qımyldarǵa joǵary moraldyq-psıhologııalyq, áskerı-arnaıy jáne dene daıyndyǵyn qalyptastyrýǵa jáne ustaýǵa kómektesýge arnalǵan.
Árbir áskerı qyzmetshige joǵary tózimdilik pen dáldikti tanytý talaby qoıylady. Arnaıy maqsattaǵy áskerı qyzmetshiler 10 kezeńnen ótýi tıis. Olardyń barysynda barlaý bólimsheleri komandırleriniń jumys deńgeıi, áskerı qyzmetshilerdiń oq atý jáne dalalyq mashyq deńgeıi, kúrdeli jaǵdaıda mindetterdi pysyqtaýǵa ázirlik deńgeıi, sondaı-aq ártúrli kásibı amaldardy oryndaý deńgeıi aıqyndalatyn bolady.
Bıyl jarysty baqylaýǵa Ázerbaıjan, Mońǵolııa, Úndistan men Túrkııa ókilderi qatysyp jatyr.