Qazaqstanda tórt donor óńir bar - Álibek Qýantyrov
Búgin Senatta «Óńirlerdiń áleýmettik-ekonomıkalyq damýyndaǵy teńgerimsizdikterdi azaıtý maqsatynda bıýdjetaralyq qatynastardy jetildirý» taqyryby talqylanyp jatyr.
«Memleket basshysy bıýdjetaralyq qatynastardyń negizgi qaǵıdattaryn saqtaýǵa, sondaı-aq tutastaı alǵanda óńirlerdiń qarjylyq derbestigin keńeıtý qajettigine nazar aýdardy jáne biz sizdermen osy taqyrypty Parlament aıasynda jıi talqylaımyz. Jalpy alǵanda, bıýdjetaralyq qatynastar júıesi óńirlerdiń bıýdjettik qamtamasyz etilý deńgeıin teńestirýge jáne eldiń Konstıtýtsııasy men zańdarynda kepildik berilgen memlekettik qyzmetter kórsetý úshin teń fıskaldyq múmkindikterdi qamtamasyz etýge baǵyttalǵan.
2008 jyldan bastap bıýdjetaralyq qatynastar turaqty sıpatqa ıe jáne bıýdjettik alymdar men sýbventsııalardyń kólemi jyl saıynǵy ózgeristersiz úsh jylǵa zańmen bekitiledi», - dedi Á. Qýantyrov
Onyń aıtýynsha, úsh jyldyq kezeńge arnalǵan sýbventsııalar men alymdardy bekitý óńirler úshin yntalandyrýshy sıpatqa ıe jáne jergilikti mańyzy bar máselelerdi sheshý úshin ákimderge qosymsha kiristerdi óz betinshe qoldanýǵa múmkindik beredi.
«Jalpy, Bıýdjet kodeksine sáıkes jalpy sıpattaǵy transfertterdiń kólemi jergilikti bıýdjettiń kiristeri men shyǵyndarynyń kóleminiń boljamy arasyndaǵy aıyrmashylyq retinde aıqyndalady. Bizde tórt donor óńir bar. Bul Atyraý men Mańǵystaý oblystary jáne Almaty men Nur-Sultan qalalary. Qalǵan on úsh óńir sýbventsııalyq bolyp sanalady. 2022 jylǵa arnalǵan alymdardyń jalpy somasy 491 mlrd teńgeni quraıdy, bıýdjettik sýbventsııa kólemi 2 trln teńgeden astam. Júıeniń máni – memlekettiń qaıta bólý fýnktsııasyn oryndaý, bıýdjettik separatızmdi boldyrmaý», - dedi mınıstr.