Qazaqstanda tórelik sottar palatasy qurylýy múmkin
ASTANA. QazAqparat - Qazaqstanda tórelik sottar palatasy qurylýy múmkin. Bul týraly búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda málim boldy.
Onda depýtattar «Tórelik sottar týraly» zań jobasyn talqylaǵan bolatyn.
Atalǵan zań jobasy halyqaralyq tórelik jáne aralyq sottardyń qyzmetin retteıtin zań aktilerin toptastyrýǵa baǵyttalady. Osylaısha, tórelik sottardyń ártúrligin retteýdiń biryńǵaı quqyqtyq tetigi qamtamasyz etilmek. Mundaı shara sot júıesin nyǵaıtý protsesine oń áser etetin bolady.
«Biz osy baǵytta biryńǵaı zań jobalary bolý kerek dep sanaımyz. Sheteldik tájirıbeler boıynsha kóptegen elderde tórelik sottar týraly zańdar bar. Al burynǵy keńestik memleketterde áli kúnge eki derbes zańdar bar. Olardyń mánisi bir bolǵandyqtan da, biz biryńǵaı zań jobasyn ázirleý kerek dep sheshtik», - dedi zań jobasy boıynsha baıandaǵan Ádilet vıtse-mınıstri Záýresh Baımoldına. Onyń aıtýynsha, zań jobasy boıynsha memlekettik múddeni qorǵaýdyń sottan tys formasyn damytý kózdeledi. Bul rette qujatta qupııalylyq qaǵıdattary keńeıtiledi. Sondyqtan da, taraptar osy qaǵıdatqa súıene otyryp, memlekettik sotqa qaraǵanda tórelik sottarǵa júgingen jón dep sanaıtyn bolady. Sonymen qatar, tórelik jasaýshy sottarǵa qatysty biliktilik talaptary arttyrylady.
«Zań jobasyndaǵy basty jańalyqtardyń biri Qazaqstanda tórelik sottar palatasyn qurý jaıynda bolyp otyr. Óıtkeni, jeke quqyqtyq daýlardyń sheshilýin damytý úshin biryńǵaı ortalyq quryp qoıý azdyq etedi. Buǵan memlekettik organdar tarapynan kúshti qoldaý qajet. Bul rette álemdik tájirıbede daýlardy sottan tys tártippen qaraı boıynsha birinshi orynda turǵan Sıngapýr eliniń tájirıbesi óte ońtaıly», deıdi Z. Baımoldına.
Onyń sózine qaraǵanda, zań jobasynda qamtylǵan normalar quqyq sýbektileri úshin memlekettik sottarǵa ıek arta bermeı, óz daýlaryn órkenıetti tártippen sheshýge úıretedi.
Zań jobasy palatanyń aldaǵy ýaqytta ótetin jalpy otyrysyna shyǵarylady.
