Qazaqstanda TOR jol qaýipsizdiginiń biryńǵaı tsıfrlyq platformasy iske qosyldy
ASTANA. KAZINFORM – Qazaqstanda jol qozǵalysy qaýipsizdigin qamtamasyz etetin biryńǵaı tsıfrlyq platforma – TOR ázirlenip, qoldanysqa engizildi, dep habarlaıdy Іshki ister mınıstrliginiń baspasóz qyzmeti.
Júıe eldegi joldarda bolyp jatqan barlyq oqıǵalardy naqty ýaqyt rejıminde jınaqtap, rettep kórsetip otyrady. Platforma ishki ister organdary qyzmetkerlerine arnalǵan biryńǵaı «tsıfrlyq tereze» retinde jumys istep, jol jaǵdaıyn ulttyq deńgeıde basqarýǵa, taldaýǵa jáne úılestirýge múmkindik beredi.
Bul joba – Memleket basshysynyń barlyq baqylaý kameralaryn jáne taný júıelerin birtutas tsıfrlyq ekojúıege biriktiretin ulttyq «Qaýipsiz qala» platformasyn qurý jónindegi tapsyrmasyn oryndaýǵa baǵyttalǵan alǵashqy qadam.
TOR platformasy derekterdi tórt negizgi kózden jınaqtaıdy: qalalar men tas joldardaǵy statsıonarlyq keshenderden, patrýldik polıtsııanyń mobıldi beketterinen, drondardan jáne ózge de qosylǵan júıelerden. Júıe óńirler, oqıǵa túrleri jáne ýaqyt kesindisi boıynsha taldaý jasap, apat jıi bolatyn núktelerdi anyqtaýǵa, qaýipti júrgizýshilerdi tirkeýge, sondaı-aq úzilissiz segiz saǵattan artyq kólik júrgizip otyrǵan tulǵalardy baqylaýǵa múmkindik beredi.
«TOR – bul búkil el aýqymynda jol qaýipsizdigin basqarýǵa arnalǵan zamanaýı qural. Júıe tek zańbuzýshylyqtardy jedel tirkep qana qoımaı, yqtımal qaýip-qaterlerdi aldyn ala boljap, jol-kólik oqıǵalarynyń aldyn alyp, adam ómirin saqtap qalýǵa kómektesedi», – dedi Іshki ister mınıstrliginiń Aqparattandyrý jáne baılanys departamentiniń bastyǵy Sergeı Vargo.
«TOR – ártúrli derekkózderden aqparat jınap, jol jaǵdaıynyń tolyq kartınasyn qalyptastyra alatyn ámbebap tsıfrlyq orta. Platformanyń arhıtektýrasy bastapqyda Qazaqstannyń erekshelikterin eskerip jasaldy jáne jaǵdaıǵa ońaı beıimdeledi. Bul barlyq jol qaýipsizdigine jaýapty taraptarǵa arnalǵan biryńǵaı jumys standartyn qalyptastyrady», – dedi Sergek kompanııasynyń bas dırektory Evgenıı Kım.
Jańa platformanyń basty ereksheligi – derekterdi biriktirýdiń biryńǵaı standarty, oqıǵalardy ortalyqtandyrylǵan vızýalızatsııalaý múmkindigi jáne bir qaladan búkil respýblıka deńgeıine deıin keńeıtý áleýeti. TOR arhıtektýrasy Big Data jáne BI-taldaý tehnologııalaryn qoldanýǵa daıyn.
Aıta keteıik, buǵan deıin Qazaqstanda jol qozǵalysy qaýipsizdigin baǵalaıtyn ulttyq baǵdarlama iske qosylǵany habarlandy.