Qazaqstanda Tomırıs patshaıym týraly fılmdi túsirý jumystary bastaldy
ALMATY. QazAqparat - Sháken Aımanov atyndaǵy «Qazaqfılm» AQ «Sataıfılm» kınokompanııasymen birlesip, «Tomırıs» aýqymdy tarıhı jobasy boıynsha jumysqa kiristi, dep habarlady «QazAqparat» HAA tilshisi kınostýdııaǵa silteme jasap.
Fılm QR Mádenıet jáne sport mınıstrliginiń tapsyrysymen túsirilip jatyr. Bas prodıýseri - Álııa Nazarbaeva («Anaǵa aparar jol»). Fılmniń qoıýshy rejısseri - Aqan Sataev («Reketır», «Adasqan», «Lıkvıdator», «Jaýjúrek Myń Bala», «Anaǵa aparar jol»).
«Qazaqfılm» kınostýdııasynyń aqparatyna sáıkes, kartına bizdiń dáýirimizge deıingi VI ǵasyrdaǵy oqıǵalar jaıynda syr shertedi. Ol kezeńde saq taıpalary uly dalany jaýlap alýǵa kelgen parsy patshasy ІІ Kırge oısyrata toıtarys beredi. Saq áskeriniń qolbasshysy massagetterdiń patshaıymy Tumar (Tomırıs) boldy. «Bul shaıqas, menińshe, halyqtar arasyndaǵy eń surapyl soǵys boldy», - dep jazdy ejelgi grek tarıhshysy Gerodot. Fılm stsenarııin ázirlegen kezde onyń eńbekteri de paıdalanylady.
«Tomırıs patshaıym týraly fılm túsirý - Álııa Nursultanqyzynyń ıdeıasy. Men jáne bizdiń komanda «Anaǵa aparar jol» jobasynda birge tabysty jumys istegennnen keıin, qýanyshpen ári úlken jaýapkershilikpen kezekti birlesken aýqymdy jobany iske asyrýǵa kirisip jatyrmyz. Qazir bizde daıyndyq jumystary júrip jatyr: stsenarıı jazý, ázirleý, joba óndirisin josparlaý, túsirý tobyn, ǵalym-konsýltanttar tizimin qalyptastyrý, tarıhı materıaldardy zerdeleý, lokatsııany aldyn ala tańdaý», - dedi rejısser Aqan Sataev.
Rejısser jalpyrespýblıkalyq kastıng jarııalanatynyn aıtty. Barlyq akterler túsirilim aldynda atqa minýge, sadaq atýǵa jáne basqa da áskerı daǵdylarǵa úıretiledi.
Túsirilim 2017 jylǵy qazanda bastalady. 2018 jylǵy aqpanǵa deıin Qazaqstan aýmaǵynda ótedi. Stsenarıı avtorlary - Álııa Nazarbaeva, Tımýr Jaqsylyqov. Budan basqa, túsirilim protsesine eldiń barlyq jetekshi shyǵarmashylyq kúshteri tartylyp, sheteldik mamandar (skrıpt-doktorlar, kompıýterlik grafıka salasyndaǵy mamandar) shaqyrtyldy.
Fılm rejısseri Aqan Sataev patshaıym týraly kınokartına halyqaralyq kórermenniń de úlken qyzyǵýshylyǵyna ıe bolatynyn atap ótti. Qazaqstandyq premera 2018 jylǵy jeltoqsanǵa josparlandy.
