Qazaqstanda tólem naryǵy qatysýshylarynyń qyzmetin retteý úshin quqyqtyq negizdi qurý kerek
ASTANA. QazAqparat - Qazaqstanda tólem júıeleriniń jumys isteýi men tólem naryǵy qatysýshylarynyń qyzmetin retteý úshin quqyqtyq negizdi qurý qajet. Bul týraly «Tólemder jáne tólem júıeleri týraly» zań jobasyna qatysty saýaldarǵa jaýap berý kezinde Ulttyq banktiń Tólem júıeleri departamenti dırektorynyń orynbasary Erlan Ashyqbekov málim etti.
«Qazirgi kezde Qazaqstannyń tólem naryǵynda kúrdeli qurylymdyq ózgerister oryn alýda, ıaǵnı naryqqa banktik emes oıynshylar kirýde, jańa býyndy tólem qyzmetteri paıda bolýda, halyqaralyq standarttardy eskere otyryp, tólem júıeleri jumystaryn uıymdastyrýda qadamdar aýysýda», - dedi E. Ashyqbekov.
Onyń sózine qaraǵanda, qoldanystaǵy zańnamalyq baza tólem naryǵy men onyń barsha sýbektileri qyzmetterin júıelik retteýdi qamtamasyz etpeıdi. Máselen, qoldanystaǵy zańnama tek bank pen onyń klıenti arasyndaǵy qatynastardy ǵana qamtı otyryp, tólemder men aqsha aýdarymdaryn júzege asyrý rásimderi boıynsha normalardy retteıdi.
«Sondyqtan da tólem naryǵynyń jumys isteýi salasynda quqyqtyq negizdi qurý men qatynystardy keshendi retteý maqsatynda jańa zań jobany ázirleý qajettegi týyndady. Bul turǵyda tólemder men aqsha aýdarymdaryn júzege asyrý rásimderi boıynsha normalardy jetildirý eskerilip otyr»,-dedi UB ókili.
Onyń aıtýynsha, Ulttyq bank osy baǵytta arnaıy zańdar qabyldaǵan Eýropalyq Odaq elderiniń, Sıngapýrdyń, Anglııanyń jáne taǵy basqa elderdiń tájirıbelerin eskergen.
Budan bólek, Ulttyq bank tólem júıeleri salasyndaǵy esep-aıyrysý boıynsha halyqaralyq standarttaryna, Dúnıejúzilik banktiń, Halyqaralyq valıýta qory sarapshylarynyń 2014 jyly júrgizgen Qazaqstannyń tólem júıelerin baǵalaý boıynsha usynymdaryna nazar aýdaryldy.
