Qazaqstanda TMD-da alǵash ret júrek qaqpashasyna protez qoıyldy
ALMATY. QazAqparat – Almatydaǵy Kardıologııa jáne ishki aýrýlar ǵylymı-zertteý (ǴZI) ınstıtýtynyń bazasynda TMD boıynsha alǵash ret júrek qaqpaqshasynyń jańa bıologııalyq protezin ımplanttaý operatsııasy jasaldy, dep habarlaıdy QazAqparat tilshisi.
52 jáne 60 jastaǵy eki naýqasqa biregeı operatsııany Saýd Arabııasynan kelgen professor Muhamed Sallah Alreshhıdan jasady. Oǵan elimiz óńirlerindegi jetekshi kardıohırýrgııa klınıkalarynyń kardıohırýrgtary qatysty.
ǴZI basqarma tóraǵasy Marat Pashımovtiń aıtýynsha, búginde medıtsınadaǵy jańa tehnologııalar myńdaǵan adamnyń densaýlyǵyn qalpyna keltirýge kómektesedi.
«Búgin bizdiń klınıkanyń bazasynda TMD aýmaǵynda alǵash ret Saýd Arabııasynyń jetekshi kardıohırýrginiń qatysýymen júrektiń qolqa qaqpaqshasyn aýystyrý úshin sońǵy býyndaǵy bıologııalyq protez ımplantatsııalandy.
Bul bıologııalyq júrek qaqpaqshasynyń protezi klapan ınnovatsııasynyń 40 jyldan astam tájirıbesine negizdelgen. Tájirıbedegi eń úzdigi jınaqtalyp, búkil álemdik tájirıbeni biriktire otyryp, jańa býyn klapany quryldy, ol joǵary gemodınamıkalyq kórsetkishterimen, paıdalaný jeńildigimen jáne beriktigimen, Varfarındi qoldanýdyń qajettiliginiń bolmaýymen erekshelenedi», - deıdi Marat Pashımov.
Dárigerdiń sózinshe, mıtraldy qaqpaqsha aqaýlary bar eki naýqas júrek aımaǵyndaǵy aýyrsyný, fızıkalyq júkteme kezinde entigý, tez sharshaý jáne taǵy basqa shaǵymdarmen statsıonarǵa túsken. Olarǵa hırýrgııalyq aralasý usynyldy.
«Júrek qaqpaqshalaryn protezdeý tehnologııalary úzdiksiz damyp keledi. Júrek qaqpaqshalaryn protezdeý operatsııasy júrekke qan aǵymyn qalypqa keltirý jáne júrek jetkiliksizdiginiń damýyna jol bermeı, júrekke qosymsha júktemeni joıý úshin júrgiziledi. Asqyný qaýpi joǵary naýqastarda, sondaı-aq egde jastaǵy adamdarda júrek qaqpaqshalarynyń bıologııalyq protezin qoldanǵan jón. Bıologııalyq qaqpaqshalardyń mańyzdy artyqshylyǵy – qandy suıyltatyn dárilerdi – antıkoagýlıanttardy ómir boıy qabyldaýdyń qajeti bolmaıdy», - dep atap ótti kardıohırýrgııa bólimshesiniń meńgerýshisi Rústem Tóleýtaev.
Dárigerlerdiń aıtýynsha, jańa býyn júrek qaqpaqshasynyń bıologııalyq protezi ońaı jáne uzaq qyzmet etedi. Bul qaqpaqshanyń qyzmet etý merzimi standartty klapandarǵa qaraǵanda uzaǵyraq.
«Qaqpaqsha ımplantatsııasy úshin standartty tásil de, sternotomııany qajet etpeıtin az ınvazıvti tehnıka da qolaıly, bul keýde qýysynyń qańqasyn saqtaýǵa, ınfektsııalyq asqynýlardyń qaýpin azaıtyp, aýyrsyný sındromyn tómendetýge kómektesedi. Sondaı-aq, operatsııadan keıingi kezeńde tynys alýdy jeńildetedi, uzaq ýaqyt boıy korset kııý qajettiligin joıady jáne qalypty ómirge tezirek oralýǵa múmkindik beredi»,- dep túsindirdi kardıohırýrgtar.
