Qazaqstanda TMD boıynsha balamasy joq ortalyq ashyldy
Aıta ketken jón, ondaı ortalyqty ashý mindeti Halyqaralyq medıtsınalyq-sanıtarlyq erejelerde jazylǵan. Atalǵan erejelerdi 196 memleket qabyldady. Olardyń ishinde Qazaqstan da bar. Negizgi maqsat - aýrý-syrqaýlardyń taralýyna jol bermeý.
Qazaqstandaǵy ortalyq barlyq quziretti memlekettik organdarmen tyǵyz jumys jasaıtyn bolady. Olardyń ishinde QR ІІM Tótenshe jaǵdaılar komıteti, QR AShM Veterınarlyq baqylaý komıteti, QR EM Atomdyq jáne energetıkalyq qadaǵalaý komıteti, QR IIDM óndiristik qaýipsizdik jáne ındýstrıaldyq damý komıteti, sondaı-aq, QR DSM Qoǵamdyq densaýlyqty saqtaý komıteti bar.
Shuǵyl ortalyq atalǵan memorgandardan túsetin barlyq aqparatty taldap, úılestirý sharalaryn júrgizetin bolady. Máselen, Tótenshe jaǵdaılar komıtetinen tabıǵı-tehnogendik sıpattaǵy apattar, bıologııalyq, hımııalyq jáne radıatsııalyq jaǵdaılar jónindegi shuǵyl aqparat túsedi. Al Veterınarlyq baqylaý komıteti adam men janýarlar úshin qaýipti aýrýlar týraly habar berip otyrady. Aldaǵy ýaqytta ortalyq mamandary da tótenshe jaǵdaılardyń aldyn alý sharalaryna atsalysady degen jospar bar.
Qoǵamdyq densaýlyqty saqtaý komıtetiniń basshysy Jandarbek Bekshınniń aıtýynsha, TMD boıynsha ondaı ortalyq áli joq. Qazaqstan birinshi bolyp, shuǵyl ortalyqty ashyp otyr.
«Bárimiz jaqsy bilemiz, álemde san alýan tótenshe jaǵdaılar oryn alyp jatady. Máselen, radıatsııany alsaq, ol - Fýkýsıma men Chernobyl. Al bıologııalyq qaýip-qaterdi alatyn bolsaq, ol - Ebola vırýsy. Budan bólek, Madagaskar ókpe obasy bar. Búkil álemdi shýlatqan koronavırýs. Keleshekte ondaı qaýip-qaterler áli bolady. Sondyqtan osy ortalyq qurylyp otyr. Onyń negizgi maqsaty - atalǵan qaýip-qaterlerdi shuǵyl túrde eskerip, tıisti aldyn alý sharalaryn úılestirý. Ortalyq táýlik boıy jumys isteıdi», - dedi J.Bekshın jýrnalısterge bergen suhbatynda.
Aıta keteıik, shuǵyl ortalyq Mınıstrlikter úıi ǵımaratynda ornalasqan. Ol jerge arnaıy keńse tehnıkasy, kompıýterlik jáne baılanys quraldary ornatyldy. Ortalyq mamandary AQSh-qa baryp, tórt aılyq oqytý kýrstarynan ótip keldi. Ázirshe, ortalyqta úsh maman jumys isteıdi. Aldaǵy ýaqytta shtatty keńeıtý josparlanyp otyr.