Qazaqstanda til oqytý ortalyqtarynyń quny qansha
ASTANA. KAZINFORM – Elimiz boıynsha aǵylshyn tilin úıretetin kýrs Qaraǵandyda, al qazaq tilin úırený Astana qalasynda qymbat. Oralda bir adamǵa arnalǵan kýrs baǵasy tómen, al Aqtóbe men Astanada joǵary. Kazinform agenttiginiń tilshi til oqytý kýrstarynyń baǵasy salystyrdy.
Birneshe tildi qatar meńgerý bul qur maqtan emes, damýdyń joly. Qazaqsha saýatty sóılegińiz kele me, álde álem tilin meńgergińiz kele me? Ol sizdiń óz erkińiz. Qazir elimizdiń til oqytý kýrstarynyń baǵasy ártúrli. Qaı óńirde til meńgerý kýrsynyń baǵasy tıimdi ekenin bile júreıik.
Eń joǵary baǵa Almaty men Astana qalasynda. Munda aǵylshyn tilin toppen birge meńgerý quny bir adamǵa aıyna 30 myń teńgeden bastalady. Al jeke ózińiz ǵana oqysańyz saǵatyna 6 myń teńge. Astanada qazaqsha úırený kýrsy ózge óńirlerge qaraǵanda áldeqaıda qymbat. Munda baǵa aıyna - 45 000 teńge. Al Almatydaorta eseppen aıyna 32 500 teńge tólep qazaqsha úırenýge bolady. Astanada bir ózińiz bir saǵatqa 6 myń teńge tólep qazaqsha úırene alasyz. Almatyda qazaqsha jeke sabaq alý Astanadan 2 myń teńgege arzan.
Qaraǵandy men Jezqazǵanda baǵa shamalas. Munda top bolyp aǵylshyn tilin úırengińiz kelse aıyna 25 000 teńge tóleısiz. Elimizdegi ortasha baǵany alsaq, Qaraǵandyda til oqytý kýrsynyń quny joǵary bolyp tur. Jeke kýrs saǵatyna 5-6 myń teńge. Al qazaq tilin úıretetin topta bilim alý kýrsy aıyna 20 myń teńge bolyp tur. Qazaq tilin jeke meńgerý quny aǵylshyn tili kýrsyna shamalas.
Shymkentte aǵylshyn tilin úıretetin adamdar aı saıyn kýrsqa 30 myń teńge jumsaıdy. Qazaq tilin úırenetinder de osy aqyny tóleıdi. Aqtaýda aǵylshyn tiliniń kýrsy 40 myń teńge bolsa, qazaq tiliniń kýrsy budan eki ese arzan. Eki qalada da jeke kýrs saǵatyna 3-5 myń teńge aralyǵynda.
Qonaevta eki tildiń kýrsy 27 myń teńgeden bastalyp, 36 myń teńgege deıin barady. Jeke oqý saǵatyna 4-5 myń teńge. Elimiz boıynsha til oqytý ortalyqtarynyń qyzmet quny Aqtóbe, Atyraý men Kókshetaýda ortasha. Bul qalalarda aǵylshyn tilin toppen oqý úshin 25-30 myń teńge tóleısiz. Al qazaqsha úırený úshin aıyna 20-25 myń teńge qajet. Aǵylshyn tilinen jeke sabaq alý - 3-6 myń teńge, qazaqsha úırený saǵatyna - 4-5 myń teńge. Aqtóbede ǵana jeke oqý kýrsy elimiz boıynsha eń joǵary bolyp tur.
Pavlodar men Taldyqorǵanda baǵa sál tómen. Aǵylshyn tili kýrsy - 25-30 myń teńge, qazaq tili kýrsy - 20-25 myń teńge. Aǵylshyn tilin bir ózińiz oqyp, meńgergińiz kelse saǵatyna 2-3 myń teńge, qazaq tili kýrsyna saǵatyna 3-5 myń teńge tóleısiz.
Qostanaı, Qyzylorda men Tarazda eki tildi de úıretetin ortalyqtardyń baǵasy qoljetimdi. Bul qalalarda aǵylshyn tili kýrsy aıyna orta eseppen 20 myń teńge, qazaq tili kýrsy shamamen 25 myń teńge. Jeke oqý kýrsynyń quny saǵatyna - 2-5 myń teńge aralyǵynda. Qyzylordada aǵylshyn tilin, al Qostanaıda qazaq tilin oqytý kýrsynyń quny joǵary bolsa, Tarazda eki kýrstyń da baǵasy ortasha.
Óskemen men Semeıde, Túrkistanda til úırený arzanǵa túsedi. Aǵylshyn tili kýrsynyń quny 20 myń teńgeden aspaıdy, al qazaq tili kýrsy - 13-18 myń teńge aralyǵynda. Aǵylshyn tilin jeke oqý úshin saǵatyna 2-3 myń teńge tóleısiz, qazaqsha úırený odan myń teńgege qymbat.
Eń tıimdi baǵa - Oral men Petropavlda. Petropavlda aǵylshyn tilin oqytý kýrsy aıyna 13 500 teńge, al qazaqsha úırený - 11 000 teńge. Oralda aǵylshyn tili kýrsynyń quny 19 500 teńge, qazaq tili kýrsy - 14 myń teńge. Petropavlda jeke oqý saǵatyna 4 myń teńge bolsa, Oralda aǵylshyn jáne qazaq tilin úırený kýrsy saǵatyna - 2-2,5 myń teńge. Bul elimiz boıynsha eń tómen baǵa.
Buǵan deıin Qazaqstan qalalarynda kıimdi hımııalyq tazalaý qyzmetiniń quny týraly jazyldy.