Qazaqstanda TKSh sektorynda energııa únemdeýdiń salalyq jospary jasaldy
ASTANA. 27 aqpan. QazAqparat - Qurylys jáne turǵyn úı kommýnaldyq isteri jónindegi agenttik materıaldarǵa, jabdyqtar men ádistemelerge qoıylatyn jańa talaptardy qamtıtyn jáne sektordaǵy jylý únemdeý máselesine baǵyttalǵan birqatar normatıvtik-quqyqtyq jáne normatıvtik-tehnıkalyq qujattardyń jobalaryn ázirleýde.
Bul jaıynda Pm.kz «TKSh QazOrtalyǵy» baspasóz qyzmetine silteme jasap habarlap otyr.
«Keshendi jospardy júzege asyrýdyń aıasynda TKSh sektorynda energııa únemdeýdiń salalyq josparyn jasaý, TShK jańǵyrtý baǵdarlamasy boıynsha termojańǵyrtý jumystaryn júrgizý úshin turǵyn úı ǵımarattary men áleýmettik-mádenı nysandarǵa energetıkalyq tekserý júrgizý josparlanyp otyr.Osynaý sharalardyń nátıjesinde bıýdjettik uıymdarda kúrdeli jóndeý jumystaryn júrgizý barysynda energııa tıimdiligi men termojańǵyrtýdyń krıterıılerin engizý týraly usynystar ázirlenedi», - dep habarlady ortalyqtan.
Buǵan qosa, 25 otandyq energoaýdıt-mamandy daıyndaý jumystary júrgizilýde. Daıyndaý jumystary Qazaqstannyń klımattyq jaǵdaıyna beıimdelgen soltústik eýropalyq «ENSI» baǵdarlamasy boıynsha qolǵa alynýda. Oqytylatyn mamandar da irikteldi.
Taǵy bir mańyzdy mindet - Elbasynyń tapsyrmasy boıynsha Astana, Almaty jáne Aqtóbe qalalarynda úsh Energııa únemdeý ortalyǵyn salý bolyp tabylady. Ol Ortalyqtarda aldyńǵy qatarly jabdyqtar ornatylyp, energııa jáne resýrs únemdeýshi tehnologııalar men materıaldar qoldanylatyn bolady.
