Qazaqstanda tyıym salynǵan dinı ádebıetter tizimi jasala ma
ASTANA. KAZINFORM – Qazaqstan aýmaǵynda tyıym salynǵan avtorlardyń jeke tizimi jasalmaıdy. Bul týraly QR Іshki ister mınıstrliginiń baspasóz qyzmeti agenttiktiń resmı saýalyna jaýap retinde habarlady.
Vedomstvonyń aıtýynsha, esepke avtorlardyń ózi emes, el aýmaǵynda saqtaý, ákelý, tasymaldaý jáne taratýǵa sot arqyly tyıym salynǵan materıaldar ǵana alynady.
– Barlyq suratylǵan materıal QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń resmı saıtynda jarııalanady. Memlekettik organdardyń ınternet-resýrstarynyń biryńǵaı platformasynda dinı saraptamalar boıynsha oń qorytyndy berilgen esepter toqsan saıyn jarııalanyp otyrady, - delingen resmı jaýapta.
Dinı ádebıetti qaı jerde taratýǵa ruqsat etilgen
QR «Dinı qyzmet jáne dinı birlestikter týraly» zańynyń 9-babyna sáıkes, dinı ádebıetti jáne basqa da dinı mazmundaǵy materıaldardy myna oryndarda taratýǵa ruqsat etilgen:
– qulshylyq ǵımarattarynda (ǵıbadat úılerinde);
– dinı bilim berý uıymdarynda;
– oblystardyń, respýblıkalyq mańyzy bar qalalar men astananyń jergilikti atqarýshy organdary arnaıy belgilegen turaqty úı-jaılarda ǵana.
Dinı ádebıetti elge ákelýge (jeke qoldanýǵa arnalǵan bir danadan basqa) tek tirkelgen dinı birlestikterge jáne tek dinı saraptamanyń oń qorytyndysynan keıin ǵana ruqsat etiledi.
Saraptama qalaı júrgiziledi
Qazaqstanda dinı saraptama júrgizýdi Mádenıet jáne aqparat mınıstrliginiń Din isteri komıteti júrgizedi. Komıtet málimetine sáıkes, Dinı saraptama júrgizý qaǵıdalarynyń 6-tarmaǵyna sáıkes, saraptama júrgizýge mynalar negiz bola alady:
– jeke jáne zańdy tulǵalardyń ýákiletti organǵa júginýi;
– dinı ádebıettiń, basqa da dinı mazmundaǵy aqparattyq materıaldardyń QR uıymdarynyń kitaphana qoryna túsýi;
– jeke tulǵalardyń mıssıoner retinde tirkelýge jáne dinı birlestikterdi tirkeýge júginýi;
– dinı mazmundaǵy aqparattyq materıaldardy (jeke paıdalanýǵa arnalǵanynan basqa) elge ákelý;
– qyzmet kórsetýshi basshysynyń buıryǵy;
– dinı ádebıetti jáne basqa da dinı mazmundaǵy aqparattyq materıaldardy daıyndaý, shyǵarý jáne taratý.
Saraptamanyń oń qorytyndysyn alǵan nátıjeleri Din isteri komıtetiniń resmı saıtynda jarııalanady.
Zań buzǵandarǵa jaýapkershilik qandaı
Dinı materıaldardy saraptamasyz daıyndaý jáne taratý úshin jaýapkershilik qarastyrylǵan. QR Ákimshilik quqyq buzýshylyq týraly kodeksiniń 490-baby 1-bóligi 3) tarmaqshasyna sáıkes, bul talaptardy buzǵandarǵa mynadaı jaza qarastyrylǵan:
– jeke tulǵalarǵa — eskertý nemese 25 aılyq eseptik kórsetkish mólsherinde aıyppul;
– zańdy tulǵalarǵa — 100 AEK mólsherinde aıyppul.
Buǵan deıin Mádenıet jáne aqparat mınıstrliginiń Din isteri komıteti Qazaqstandaǵy medreseler jumysy qalaı retteletinin túsindirgen edi.