Qazaqstanda tisti qalpyna keltiretin dári tabyldy
ASTANA. QazAqparat - Qazaqstanda tisti qalpyna keltiretin dári el aýmaǵyndaǵy birqatar qalalarda qoldanyla bastady. Bul týraly búgin Ortalyq kommýnıkatsııalar qyzmetinde ótken brıfıngte «InnoDent» JShS dırektory Baýyrjan Aıtýov málim etti.
«Bizdiń jańalyq tis jegisiniń alǵashqy kezeńderinde tisti burǵylamaı-aq emdeýge múmkindik beredi. Tehnologııa tis emaliniń tabıǵı qaıta qalpyna kelýin ımıtatsııalaıdy. Eger klınıkada sizdiń nemese balańyzdyń tisinen jeginiń alǵashqy belgisin anyqtaıtyn bolsa, tiske bizdiń ónimniń bir tamshysy tisińizge tamyzylady. Bir aıdyń ishinde tistiń syrtqy qabaty qalpyna keledi. Ólgen tinder qaıta ósedi. Jańalyǵymyzdyń ınnovatsııalyq tusy - bul bir rettik protsedýra. Tiske plomba salý jáne tisti tesý qajettiligi bolmaıdy. Ol 15 mınýtqa ǵana sozylady», - dep atap ótti atalmysh ónimdi oılap tapqan B. Aıtýov.
Onyń aıtýynsha, atalmysh tehnologııa halyq úshin óte qoljetimdi jáne qarapaıym plombalaý ádisinen qymbat bolmaıdy.
«Ónimdi biz ózimizdiń formýlamen Shveıtsarııada jasaımyz. Biz ony Astanada tystap, ary qaraı klınıkalarǵa ótkizemiz. Tehnologııalyq damý boıynsha ulttyq agenttikten biz ınnovatsııalyq startapty qoldaý grantyn utyp aldyq. Ol qarajat bizdiń ónimdi qaptamaǵa oraý tehnıkasyn satyp alýǵa jumsaldy. Bul ónim qazirgi ýaqytta qoljetimdi, ıaǵnı sizder klınıkaǵa baryp, tıisti em-dom ala alasyzdar. Almatyda - 35, Astanada - 11 klınıkada bar. Sonymen qatar Reseıdiń - 15, Ýkraınanyń 15 klınıkasynda qoldanylýda. Osy aıda biz Shymkentke, Óskemenge oqytý ótkizý úshin baramyz. Jyl sońyna deıin osy eki qalada shamamen 20 klınıkada InnoDent tehnologııasymen emdeý paıda bolady dep boljap otyrmyz», - deıdi ónertapqysh.
Aıta keteıik, respýblıkanyń eń úzdik jobalary 25 qarasha kúni Innovatsııalyq kongress barysynda usynylmaq. Al eń úzdikteri keler jyly bolatyn halyqaralyq EKSPO-2017 kórmesinde kórsetiletin bolady.
