Qazaqstanda tirkelmegen ónerkásiptik úlgilerdi qysqa merzimdi qorǵaý engiziledi

NUR-SULTAN. QazAqparat - «Zııatkerlik menshik týraly» zańǵa birqatar túzetý engizildi. Bul týraly QR Ádilet vıtse-mınıstri Aqerke Ahmetova aıtty, dep habarlaıdy QazAqparat tilshisi.

«Tirkelmegen ónerkásiptik úlgilerdi qysqa merzimdi qorǵaý engiziledi. Bul 2015 jyldyń 21 jeltoqsandaǵy Eýropa Odaǵymen Keńeıtilgen áriptestik jáne yntymaqtastyq týraly kelisim aıasynda qabyldanǵan mindettemelerge sáıkes keledi. Mundaı qorǵaý quqyq ıelenýshilerdi biregeı buıymdardyń syrtqy túrin tikeleı kóshirýden qorǵaýǵa múmkindik beredi», - dedi Aqerke Ahmetova Ortalyq kommýnıkatsııalar qyzmetinde ótken baspasóz máslıhatynda.

Munan bólek, onyń atap ótýinshe, taýar tańbalary, geografııalyq kórsetkish jáne taýarlardyń shyǵarylǵan jeriniń ataýlary jónindegi «oppozıtsııalyq» júıe múddeli tulǵalarǵa ótinimdi qaraý kezeńinde saraptama jasaý uıymyna qarsylyq jiberýge múmkindik beredi.

«Bul taýar belgilerin, geografııalyq kórsetkishterdi jáne taýar shyǵarylǵan jerlerdiń ataýlaryn tirkeýge daý aıtýdyń yqtımal táýekelderin joıady. Patenttik senim bildirilgen ókilder bóliginde túzetýler qoıylatyn biliktilik talaptaryn, patenttik senim bildirilgen ókildiń quqyqtaryn naqtylaýǵa jáne ony tizilimnen alyp tastaý rásimine baǵyttalǵan. Túzetý patenttik senim bildirilgen ókilder kórsetetin qyzmetterdiń sapasyn arttyrýǵa múmkindik beredi», - dedi ol.