Qazaqstanda tirkelgen jeńil kólikterdiń sany 80,6% artty
ASTANA. QazAqparat - Qazaqstanda 2018 jyldyń qańtar-qazan aılarynda 754 751 jeńil avtokólik tirkeldi. Bul 2017 jyldyń osyndaı kezeńimen salystyrǵanda 80,6 paıyzǵa kóp, dep habarlaıdy «QazAqparat» HAA QR Ulttyq ekonomıka mınıstrliginiń Statıstıka komıtetine silteme jasap.
Bıylǵy jyldyń 1 qarashasyndaǵy jaǵdaı boıynsha, Qazaqstanda tirkelgen jeńil avtokólikterdiń sany 4053,7 myń birlikti quraǵan. Eseptik kezeńde 12 777 jol-kólik oqıǵasy tirkeldi. Bul byltyrǵy jylmen salystyrǵanda 9,1 paıyzǵa az. Bul rette jol apattarynan 18 128 adam zardap shekken.
1 qarashada kólik quraldary ıeleriniń azamattyq-quqyqtyq jaýapkershiligin mindetti saqtandyrý uıymdary 17,6 mlrd teńge somasyna 48 424 saqtandyrý tólemin júzege asyrdy.
