Qazaqstanda tirkelgen zańdy tulǵalardyń sany byltyrmen salystyrǵanda 4 paıyzǵa artty
ASTANA. QazAqparat - 2015 jylǵy 1 naýryzdaǵy jaǵdaı boıynsha Qazaqstanda tirkelgen zańdy tulǵalardyń sany 355 myń 808 birlikti qurap, ótken jylǵy sáıkes kezeńmen salystyrǵanda 4 paıyzǵa artty. Bul týraly Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Tirkelgen zańdy tulǵalardyń ishinde qyzmetkerleriniń sany 100 adamnan kem bolatyn zańdy tulǵalar sany 346891 birlikti quraıdy.
Sonymen qatar, naqty jumys istep turǵan zańdy tulǵalardyń sany 199104-ti qurady, onyń ishinde 190636 birlik shaǵyn kásiporyndar (100 adamnan kem) bolyp tabylady.
Málimetterge súıensek, 2015 jylǵy qańtar-aqpanda «Saýda» salasy boıynsha naqty kólem ındeksi 103,2 paıyzdy quraǵan. Al osy kezeńdegi bólshek saýda kólemi (qoǵamdyq tamaqtandyrý aınalymynsyz) 857,2 mlrd. teńgeni qurap, 2014 jylǵy qańtar-aqpanmen salystyrǵanda 3,9 paıyzǵa ósti. Sonymen qatar, tutyný baǵasynyń ındeksi 2015 jylǵy aqpanda 2014 jylǵy jeltoqsanmen salystyrǵanda 101 paıyzdy quraǵan. Azyq-túlik taýarlaryna baǵalar - 1,4 paıyz, halyqqa arnalǵan aqyly qyzmetterge - 2,1 paıyzǵa ósip, azyq-túlik emes taýarlarǵa - 0,6 paıyzǵa tómendegen.
