Qazaqstanda tirkelgen zańdy tulǵalar sany 2,8 paıyzǵa artty
ASTANA. QazAqparat - 2015 jylǵy 1 maýsymdaǵy jaǵdaı boıynsha Qazaqstanda tirkelgen zańdy tulǵalardyń sany 356 001 birlikti qurap, ótken jylǵy sáıkes kezeńmen salystyrǵanda 2,8 paıyzǵa artty.
Sonyń ishinde qyzmetkerleri 100 adamǵa jetpeıtin zańdy tulǵalar sany - 346 967 birlikti qurady. Al jumys istep turǵan zańdy tulǵalardyń sany 215 835-ke jetse, sonyń ishinde 207 110 birlik shaǵyn kásiporyndar bolyp tabylady. Bul týraly Ulttyq ekonomıka mınıstrliginiń baspasóz qyzmetinen habarlandy.
Málimetterge qaraǵanda, 2015 jylǵy qańtar-mamyrynda Qazaqstanda bólshek saýda kólemi 2254,9 mlrd. teńgeni qurap, 2014 jylǵy qańtar-mamyrmen salystyrǵanda 2,9 paıyzǵa ósken. Al kóterme saýda kólemi 5644,6 mlrd. teńgeni qurap, byltyrǵa qaraǵanda 2,4 paıyzǵa artty.
«Budan bólek, esepti kezeńde tamaq ónimderi men sýsyndardy usyný boıynsha qyzmetter kólemi 104 mlrd. teńgeni qurady. Al osy ýaqyt ishinde elimizdegi syrtqy saýda aınalymy 25910,2 mln. AQSh dollaryn qurap, 2014 jylǵy kańtar-sáýirmen salystyrǵanda 37,3 paıyzǵa tómendedi, onyń ishinde eksport - 15777,1 mln. dollaryn (46% az), ımport - 10133,1 mln. dollaryn qurady (16,3% az). Ónerkásip ónimderine óndirýshi kásiporyndar baǵasy 2015 jylǵy mamyrda 2014 jylǵy jeltoqsanmen salystyrǵanda 14,5% tómendedi», delingen baspasóz baıanynda.
