Qazaqstanda tirkelgen ushaqtar Lıvııaǵa qarý-jaraq tasymaldaǵan
Bıylǵy aqpan aıynda BUU Qaýipsizdik keńesi Qazaqstanda tirkelgen áýe kemelerimen Lıvııaǵa qarý jetkizý embargosyna qatysty BUU Qaýipsizdik keńesi sanktsııalarynyń buzylýy boıynsha hat joldady.
«Qazaqstan Respýblıkasynyń Indýstrııa jáne ınfraqurylymdyq damý mınıstrligi quqyq qorǵaý organdarymen birlesip, BUU QK embargosyn buzǵan Qazaqstanda tirkelgen úsh áýe kompanııasymen jumys júrgizdi. Olar - «Azee Air» JShS, «Sigma Airlines» JShS jáne «Jenis Air» JShS. Osy paıdalanýshylardyń áýe kemeleriniń menshik ıeleri - Birikken Arab Ámirlikterinde («AGANYA LTD») jáne Brıtandyq Vırgın araldarynda («Infinitive Seal Inc.») tirkelgen sheteldik kompanııalar. Atalǵan paıdalanýshylardyń áýe kemeleri Taıaý Shyǵys aımaǵynda sheteldik tapsyrys berýshilerdiń múddesi úshin paıdalanylǵan. Áýe kemeleriniń negizgi bazasy - Birikken Arab Ámirlikteri» dep habarlady komıtetten.
BUU Qaýipsizdik keńesiniń sanktsııasy bar elderge reıster úshinshi elderdiń aýmaǵynan júzege asyryldy. Halyqaralyq praktıkaǵa sáıkes, shetelde qalyptasqan tasymaldanatyn júktiń sıpatyn paıdalanýshy memleket, ıaǵnı Qazaqstan tarapy baqylamaıdy, kerisinshe ushýdy júzege asyratyn shet memleketterdiń memlekettik organdary baqylaıdy.
«Qazaqstan Respýblıkasy zańnamasynyń, IKAO standarttary men usynylatyn praktıkasynyń talaptaryn saqtaý turǵysynan tekserý nátıjeleri boıynsha Qazaqstan avıatsııa ákimshiligi bas dırektorynyń 2020 jylǵy 29 mamyrdaǵy №167/1 buıryǵyna sáıkes, azamattyq áýe kemeleriniń atalǵan úsh áýe kompanııanyń paıdalanýshysy sertıfıkatyn, onyń ishinde «Sigma Airlines» JShS paıdalanýshy sertıfıkatynyń qoldanýy ýaqytsha toqtatyldy. Qazaqstan Respýblıkasynyń Syrtqy ister mınıstrligi 2020 jylǵy 5 maýsymda BUU Qaýipsizdik keńesiniń Lıvııa jónindegi komıtetiniń jetkizilimge embargosynyń buzylýyna qatysty baıandamasyn usyndy. BUU Qaýipsizdik keńesiniń baıandamasynda tergeý barysyndaǵy qazaqstandyq bılik pen Qazaqstannyń avıatsııa ákimshiliginiń ashyqtyǵy men yntymaqtastyǵy úshin BUU sarapshylar tobynyń alǵysy atap ótildi» delingen habarlamada.
Elimizdiń ımıdjin qaqtyǵys aımaqtaryna nemese BUU Qaýipsizdik keńesiniń sanktsııasyndaǵy elderge qarý-jaraq pen áskerı tehnıka jetkizýdiń «ashyq emes shemalaryna» tartylǵan josyqsyz sheteldik áýe kompanııalardyń áreketterinen saqtaý maqsatynda júk tasymaldaýǵa jáne olardy keıinnen baqylaýǵa arnalǵan áýe kemelerin tirkeý úshin qosymsha sharttar ázirlendi, olar Qazaqstan Respýblıkasynyń áýe keńistigin paıdalaný jáne avıatsııa qyzmeti týraly QR zańyna ózgerister engizý týraly zań jobasyna engizildi.
Atalǵan normalar 2020 jyldyń sońyna deıin Ekonomıkalyq ósýdi qalpyna keltirý máseleleri boıynsha keıbir zańnamalyq aktilerge ózgerister men tolyqtyrýlar engizý týraly zań jobasynyń aıasynda qabyldanady dep kútilýde.
Osy baǵyttaǵy jumystar jalǵasyp jatyr.
