Qazaqstanda tirkelgen shetel elshilikteriniń 80 paıyzy elimizge resmı notalardy qazaq tilinde joldaıdy
ASTANA. 13 jeltoqsan. QazAqparat - Qazaqstanda tirkelgen dıplomatııalyq mıssııalar men shetel elshilikteriniń 80 paıyzy elimizge resmı notalardy qazaq tilinde joldaıdy. Bul týraly búgin Astanada úsh tilde jaryqqa shyqqan dıplomatııalyq sózdikterdiń tusaýkeser rásiminde QR Syrtqy ister vıtse-mınıstri Qaırat Sarybaı málim etti.
«Qazaqstanǵa arnalǵan resmı notalardy qazaq tilinde joldaý jóninde 2007 jyly Qazaqstannyń Syrtqy ister vedomstvosyn sol kezde basqarǵan Marat Tájın usynys tastaǵan bolatyn. Bul, eń birinshiden, sol eldiń memlekettik tiline degen qurmet, ekinshiden praktıkalyq turǵyda óte tıimdi. Ol kezde birdi-ekili elshilik qana Qazaqstannyń Syrtqy ister mınıstrligine resmı notalardy qazaq tilinde nemese onyń qazaq tilindegi aýdarmasymen qosa berip júrdi. Qazirgi ýaqytta Qazaqstanda tirkelgen dıplomatııalyq mıssııalar men elshilikterdiń 80 paıyzǵa jýyǵy bizge notalardy qazaq tilinde nemese onyń qazaq tilindegi aýdarmasymen joldaıdy», - dedi Q.Sarybaı.
