Qazaqstanda tirkelgen 622 bosqynnyń 99 paıyzy Aýǵanstan azamattary - G. Ábdihalyqova
ASTANA. Qarashanyń 11-i. QazAqparat /Qanat Mámetqazyuly/ - Qazaqstanda búgingi kúni tirkelgen bosqyndar sany 622 adamdy qurasa, onyń 99 paıyzy Aýǵanstan azamattary bolyp tabylady. QR Parlamenti Májilisiniń jalpy otyrysynda «Bosqyndar týraly» zań jobasy boıynsha baıandama jasaǵan Eńbek jáne halyqty áleýmettik qorǵaý mınıstri Gúlshara ábdihalyqova osylaı málim etti,
dep habarlaıdy QazAqparat.
«Aǵymdaǵy jylǵy qazannyń 1-degi málimet boıynsha Qazaqstanda tirkelgen bosqyndar sany 622 adamdy qurap otyr. Bosqyn mártebesin alǵandardyń basym bóligi, naqtylap aıtqanda 99 paıyzy Aýǵanstannan kelgen azamattar. Ulttyq quramy boıynsha bólinisine keletin bolsaq, olardyń 54 paıyzyn nemese 338 adamdy - tájikter men púshtindar quraıdy. Al qalǵany - hazarlar men ózbekter jáne basqa ult ókilderi», dedi G. Ábdihalyqova. Mınıstrdiń aıtýynsha, bosqyndardyń ishinde eńbekke qabiletti jastaǵylary 402 adamdy (64 paıyz) quraıdy. 211 adam 16 jasqa deıingi balalar bolsa, 9 adam - zeınet jasyndaǵy kisiler.
