Qazaqstanda tıimsiz aýyl sharýashylyǵy sýbsıdııalary joıyldy
ASTANA. QazAqparat - Qazaqstanda tıimsiz aýyl sharýashylyǵy sýbsıdııalary joıyldy. Bul jaıynda QR Aýyl sharýashylyǵy mınıstrli Asqar Myrzahmetov Qaraǵandy qalasynda ótken halyqpen esepti kezdesýi barysynda aıtty, dep habarlaıdy QazAqparat.
«Sýbsıdııanyń 65 túri qaıta qaralyp, tıimsiz 11-i alynyp tastaldy. 40-nyń krıterııleri ózgertildi. Al 14-i ózgerissiz qaldyryldy. Nátıjesinde jyl saıyn 25 mlrd teńge únemdeletin bolady. Al ózgertilgen krıterııler sol bıýdjettiń aıasynda aýyl sharýashylyǵy óndirisi kólemin orta eseppen 29 protsentke arttyrmaq», - dep atap ótti mınıstr.
Asqar Myrzahmetovtiń aıtýynsha, ótken jyl ekonomıkanyń agrarlyq sektory úshin asa tabysty boldy. Aýyl sharýashylyǵynyń jalpy ónim kólemi 2016 jyly 3,6 trln teńgeni qurady, bul aldyńǵy jyldyń deńgeıinen 5,5 protsentke joǵary. Óndiris kóleminiń ósimin sońǵy 10 jylda alǵash ret barlyq oblystardy qamtyp otyr. Aýyl sharýashylyǵynyń negizgi kapıtalyna salynǵan ınvestıtsııalar kólemi 164 mlrd teńgeden 253 mlrd teńgege deıin ósti.
Aǵymdaǵy jyly memlekettik baǵdarlama aıasynda egis alqaptaryn ártaraptandyrý bastaldy. Bul úshin mınıstrlikter men ákimdikter arasynda arnaıy memorandýmǵa qol qoıyldy. ıAǵnı, onyń aıasynda maıly jáne jemdik daqyldardyń aýmaqtary keńeıtilip, jarma men mal azyqtyq daqyldary, sondaı-aq, qant qyzylshasy aýmaǵyn 930 myń gektarǵa arttyrý qarastyrylǵan.
«Kóktemgi dalalyq jumystar úshin nesıelerdyń sońǵy baǵamy tuńǵysh ret 6 protsentke tómendedi. Bul kórsetkish byltyr 9 protsentti quraǵan bolatyn. Óz kezeginde, bul jaǵdaı nesıe berý qurylymdary satylarynyń qysqarýy nátıjesinde múmkin bolyp otyr»,- dedi ol.
Mınıstrdiń dereginshe, aýyl sharýashylyǵy kooperatsııalaryn qoldaý úshin bıylǵy jyly 52 mlrd teńge bólindi. Onyń ishinde Nátıjeli jumyspen qamtý boıynsha 27 mlrd teńge jáne Aýyl sharýashylyǵyn qarjylaı qoldaý qory arqyly 25 mlrd teńge qarastyrylǵan. Eger memlekettik baǵdarlama boıynsha 2017 jyly 326 kooperatıv qurý josparlanǵan bolsa, endi onyń sanyn 467-ge jetkizý josparlanyp otyr. 30 mamyrǵa deıin 286 birlik, onyń 102-si sút daıyndaý boıynsha, 181-i et óndirý jáne daıyndaý boıynsha tirkeldi. 20136 bas iri qaraǵa arnalǵan otbasylyq mal bordaqylaý alańdary men 51 jylyjaı salyndy. Aýylsharýashylyq ónimderiniń taýar óndirisine 40 myńnan asa JQSh men shaǵyn fermerlik sharýashylyqtar tartyldy.
