Qazaqstanda tez daıyndalatyn kespe men ramen baǵasy qansha
ASTANA. KAZINFORM - Tez daıyndalatyn kespeniń eń arzany jáne qymbaty qaıda satylatynyn Kazinform agenttiginiń tilshisi salystyryp kórdi.
Búginde dúken sóresinde azyq-túlik tolyp tur. Tańdaý kóp bolsa da tez daıyndalatyn lapshany satyp almaıtyn adam kemde-kem. Ásirese ol jasóspirimder men stýdentterdiń súıikti asyna aınalǵan. Bar bolǵany 5 mınýtta daıyndalatyn taǵamnyń túrli dámdeýishi de erekshe dám beredi.
Biz tez daıyndalatyn kespe men ramenniń óńirlerdegi baǵasyn salystyrdyq. Baǵa tek óńirlerdiń qaıda ornalasqanyna ǵana emes, sonymen birge qaptamasyna, óndirýshige de baılanysty. Arnaıy ydystaǵysynyń baǵasy jumsaq qaptamadaǵy kespege qaraǵanda eki ese qymbat. Alaıda jolǵa shyqqanda dál osy ydystaǵysyn alǵan tıimdi. Óıtkeni shanyshqysy da, sý quıatyn ydysy da ózinde bolady.
Eger óndirýshi týraly aqparatty nazarǵa almaıtyn bolsaq, jumsaq qaptamadaǵy kespeniń eń arzany Qostanaı qalasynda satylady. Sebebi munda kespe daıyndaıtyn óndiris orny bar. Munda baǵa 83 teńgeden bastalady. Oralda (104-200 tg), Almatyda (109-204 tg) jáne Aqtóbede (110-290 tg) baǵa odan sál joǵary. Al Óskemen men Semeı (130tg), Túrkistan (130-320 tg), Pavlodar (135-210 tg) jáne Shymkentte (150 -375 tg) tez daıyndalatyn kespe baǵasy elimiz boıynsha ortasha. Al baǵasy 160 teńgeden bastalatyn kespe Qaraǵandy(160-200 tg), Petropavl (165-184 tg), Taraz (175-190 tg) jáne Jezqazǵanda (180 tg) satylady. Al jumsaq qaptamadaǵy kespeniń eń qymbaty - Kókshetaý (188-200 tg), Astana (200 tg) jáne Qyzylordada (220-400 tg).
Arnaıy qaptamadaǵy kespe baǵasy áldeqaıda joǵary. Alaıda ony kez kelgen jerde, ıaǵnı, demalysta, poıyzda, jumysta daıyndap alýǵa bolady. Mundaı kespe Almaty (245 — 399 tg) men Oralda (275 tg) arzan. Al Taraz (290-380 tg), Aqtóbe (290 — 427 tg), Shymkent (290-555 tg) jáne Petropavlda (297–425 tg) baǵa odan sál joǵary. Túrkistan, Pavlodar, Kókshetaý, Astana men Qaraǵandyda baǵa 300 teńge jáne odan joǵary. Tez daıyndalatyn ári arnaıy qaptamadaǵy kespe Qyzylorda (400 tg), Qostanaı (410-512 tg), Jezqazǵan (450 — 650 tg), Óskemen jáne Semeıde (460 tg) qymbat.
Sonymen birge biz qazaqstandyqtar jıi tutynatyn kespeniń markasyn da salystyrdyq. Jumsaq qaptamadaǵy Doshırak kespesi Qostanaıda - 102, Almatyda 109 teńge. Bul elimizdegi eń arzany. Oralda aktsııa kezinde 137 teńgege, al Tarazda jeńildiksiz 175 teńgege satyp alýǵa bolady. Petropavlda — 184 tg. Doshırak kespesiniń baǵasy Aqtóbe men Pavlodarda 195 tg teńgeden bastalady. Ortasha baǵa Astana men Kókshetaýda tirkeldi. Munda baǵa 200 teńgeden bastalady. Qyzylordada baǵa — 240 tg. Doshırak Túrkistanda 320 tg, al Shymkentte 375 tg. Eń qymbaty Qaraǵandy men Jezqazǵanda satylady. Baǵa 435 tg bastalady.
Sonymen birge Rollton kespesiniń baǵasyn salystyrdyq. Eń arzany - 103 teńge. Bul kespe Oralda satylady. Aqtóbede kespe baǵasy 110 teńgeden, Kókshetaýda 120 teńgeden joǵary. Baǵa Almatyda 129 tg, Túrkistanda 130 teńgeden jáne Pavlodarda 135 teńgeden joǵary. Rolltonnyń ortasha baǵasy birneshe qalada tirkeldi. Shymkentte 150 tg, Qaraǵandyda 160 tg, Tarazda 175 tg jáne Petropavlda 176 teńgeden joǵary. Al Jezqazǵanda 180 tg, Qostanaıda 185 teńgeden joǵary. Rolltonnyń qymbaty Astanada 200 teńge, Qyzylordada 220 teńgeden joǵary.
Taǵy bir túri - BIG BON. Bul kespeniń arzany Oral qalasynda satylady. Baǵa 154 teńgeden bastalyp tur. Petropavlda baǵa odan 10 teńgege joǵary. BIG BON kespesiniń jumsaq qaptamasy Taraz ben Aqtóbede 175 teńge jáne odan joǵary. Shymkentte baǵa - 177 tg. Qaraǵandyda 180 teńge, Qostanaıda 186 teńge jáne Kókshetaýda 188 teńge jáne odan joǵary. BIG BON baǵasy Pavlodarda 195 tg, Jezqazǵanda jáne Astanada 200 tg, sonymen birge Almatyda 204 teńgeden bastalady. BIG BON kespesiniń qymbaty Qyzylordada 400 teńge, Túrkistanda 425 teńge.
Qazaqstandyqtar ramendi de súıip jeıdi. Jumsaq qaptamadaǵy kespeniń meıramhana men úıde daıyndalatyn taǵamǵa jetpeıtini anyq. Degenmen qalalyqtar ony da jıi tutynady. Munda da túri óte kóp, baǵasy da ártúrli. Qazirgi kezde eń arzany Pavlodarda 229 teńge, odan sál joǵary baǵa Oralda 258 teńge. Pavlodarda 310 tg, Shymkentte 345 tg, Qostanaıda 360 tg, Túrkistanda 370 tg jáne Astanada 375 tg, sonymen birge Almatyda 390 teńgeden joǵary. Al ramen baǵasy Qyzylordada 400 tg, Qaraǵandyda 450 tg, Tarazda 455 tg jáne Kókshetaýda 458 teńgeden joǵary. Elimiz boıynsha eń joǵary baǵa Óskemen men Semeıde (540 tg), Jezqazǵanda (550 tg) jáne Aqtóbede (800 tg) bolyp tur.
Kazinform tilshisi buǵan deıin nan ónimderiniń baǵasyn salystyrdy.