Qazaqstanda terrorızmge qarsy kúrestiń jańa tujyrymdamasy qabyldanýy kerek - Ǵ. Qasymov
ASTANA. Jeltoqsannyń 8-i. QazAqparat /Qanat Mámetqazyuly/ - Qazaqstanda terrorızmge qarsy kúrestiń jańa tujyrymdamasy qabyldanýy kerek. Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń otyrysyndaǵy «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda senator Ǵanı Qasymov osyny málim etti,
dep habarlaıdy QazAqparat.
«Qazaqstan terrorızmge qarsy birlesip kúresý jónindegi kóptegen halyqaralyq aktilerdi qabyldady, birshama osyndaı mazmundaǵy sharttarǵa qosylyp otyrmyz. Biraq, budan jaǵdaıdyń ózgeretinindeı másele ańǵarylýy tıis. Bul rette elimizdiń barlaý qyzmeti, Syrtqy ister mınıstrliginiń qyzmetteri, syrtqy saıasat bólimsheleri aqparatty jetkizý kózderi bolyp, shıraq qımyldaýy shart. Eger bizdiń qolymyzda osy baǵyttaǵy aqparattyq baza bolmasa, onda terrorızmniń aldyn alý da qurǵaq sózge aınalady. Sondyqtan da, múddeli memlekettik organdar eń aldymen terrorızmniń aldyn alý máselesine jumylýlary qajet. Osy rette Qazaqstan terrorızmge qarsy kúres jónindegi jańa tujyrymdamasyn qabyldaýy kerek», dedi Ǵ. Qasymov.
Senatordyń aıtýynsha, bul tujyrymdamada Qazaqstan 2010 jyldan bastap ártúrli salada jańa qadamdar jasaıtyny eskerilip, negizgi basymdyqtary kórsetilýi kerek. «Bul bir ǵana Ulttyq qaýipsizdik komıtetiniń máselesi emes, memleket múddesi», dedi Ǵ. Qasymov.
