Qazaqstanda terrorızmdi qarjylandyryp júrgen uıymdardyń tizimi jasalyp jatyr
ASTANA. 22 qarasha. QazAqparat - Qazaqstanda terrorızmdi qarjylandyrǵan uıymdardyń tizimi jasalatyn bolady.
Búgin Parlament Májilisinde ótken konferentsııa barysynda sóz sóılegen QR Bas prokýrorynyń birinshi orynbasary Iogan Merkel osylaı málimdedi.
I.Merkeldiń aıtýynsha, Bas prokýratýra bundaı tizimdi quqyq qorǵaý organdarynyń muqııat tekserýlerin negizge ala otyryp júrgizetin bolady. Osyǵan oraı, Bas prokýrordyń orynbasary qoldanystaǵy zańnamaǵa ózgerister engizilýi múmkin ekenin de joqqa shyǵarmaıdy.
«Qarjy mınıstrliginiń Qarjylyq monıtorıng jónindegi komıteti qurylǵan 2008 jyldan beri qaraı qylmystyq jolmen alynǵan kiristerdi jylystatýǵa, sondaı-aq terrorızmdi qarjylandyrýǵa qatysy bolýy múmkin uıymdar men tulǵalar týraly 190 materıal quqyq qorǵaý organdaryna joldanǵan. Quqyq qorǵaý organdarynyń 110 saýal jasaýy boıynsha jekelegen qarjy operatsııalarynyń túp-tórkini túgel tekserilip, qadaǵalanyp, soǵan oraı sáıkes sharalar qabyldanǵan. Jalpy álemdik qarjylyq baqylaýdyń bólimsheleriniń arnaıy birlestikterine engennen soń, qarjy monıtorıngi komıteti terrorısterdiń elimizdegi, sondaı-aq shetelderdegi qarjy mekemeleri arqyly jasalatyn kez kelgen transaktsııasyn baqylaýdyń aıtarlyqtaı múmkindigine ıe bola alady», - dedi I. Merkel.
