Qazaqstanda terrorıstik qylmystar úshin 57 úkim shyǵaryldy

ASTANA. QazAqparat - Qazaqstanda bıylǵy jyldyń toǵyz aıynda terrorızmge qatysty - 57 jáne ekstremıstik qylmystar boıynsha 83 is qaralyp, úkimder shyǵaryldy. Bul týraly búgin Astanada ótken dóńgelek ústel otyrysy barysynda QR Joǵarǵy soty Qylmystyq ister jónindegi sot alqasynyń tóraǵasy  Abaı Rahmetýlın aıtty, dep habarlaıdy QazAqparat.

Joǵarǵy sot ABA ROLI Amerıkalyq zańgerler qaýymdastyǵy ókildiginiń qoldaýymen «Qylmystyq sot isin júrgizýdi jetildirý máseleleri. Qylmystyq isterdiń jáne buıryq arqyly is júrgizýdiń jekelegen sanattary boıynsha quqyq qoldaný praktıkasy» atty taqyrypta dóńgelek ústel otyrysyn ótkizdi. 

Onyń jumysyna Bas prokýrordyń orynbasary Erlik Kenenbaev, Іshki ister mınıstriniń orynbasary Rashıd Jaqypov, Joǵarǵy jáne jergilikti sottardyń sýdıalary, quqyq qorǵaý jáne arnaýly memlekettik organdardyń, «Atameken» UKP ókilderi men ǵylymı qyzmetkerler qatysty.

Shara barysynda Abaı Rahmetýlın ekstremızm men terrorızmge qatysty ister boıynsha aıyptalýshylardyń i-áreketterin baǵalaý máselesinde «jarııalylyqty» eskerý kerektigin atap ótti. Sonymen birge, A.Rahmetýlın ekstremızm men terrorızm adamzatqa tóngen eń qaýipti faktorlardyń biri ekenin tilge tıek etti. Onyń aıtýyna qaraǵanda, Qazaqstannyń sottary 2018 jyldyń 9 aıy ishinde terrorızmge qatysty - 57 jáne ekstremıstik qylmystar boıynsha 83 isti qarap, úkimder shyǵardy.

Dóńgelek ústelde sonymen qatar Joǵarǵy sottyń sýdıasy Erden Áripov terrorızm aktisi bir jerdi jaryp jiberý nemese órteýmen ǵana emes, sondaı-aq aqparattyq-kommýnıkatsııalyq jelilerge aqparat taratý arqyly da júzege asyrylatynyn jetkizdi. Naqtyraq aıtqanda, ondaı qylmysqa qatysty pıǵyly barlar úshinshi adam arqyly nemese úgitteý jolymen óziniń qylmystyq josparyn iske asyrýy ábden yqtımal.