Qazaqstanda teńiz ónimderiniń baǵasy qansha
Kazinform agenttiginiń tilshisi Qazaqstan óńirlerindegi asshaıan, shaıan jáne mıdııa baǵasyn bildi.
Teńiz ónimderi Omega-3 maı qyshqylyna baı. Sondyqtan bolar keıingi kezde adamdar aptasyna bir kúndi balyq jeýge arnaıdy. Bul júrek-qan tamyrlary júıesin nyǵaıtýǵa, holesterın deńgeıin tómendetýge jáne zat almasýdy qalpyna keltirýge septigin tıgizedi. Sonymen birge teńiz ónimderinde boıǵa tez sińetin aqýyz bar. Iod, myrysh, selen, kaltsıı jáne qalqansha bezi jumysyna oń áser etetin V tobynyń dárýmenin teńiz ónimderinen taba alamyz. Adam ımmýnıtetin nyǵaıtady, júıke júıesin qalpyna keltiredi.
Balyq, asshaıan, shaıan jáne mıdııany turaqty tutyný shash, súıek, bet terisine paıdaly. Medıtsına qyzmetkerleri aptasyna bir emes, eki ret tutynýǵa keńes beretini sodan bolsa kerek.
Sol teńiz óńirderi adamdar úshin qoljetimdi me?
Biz asshaıan, shaıan jáne mıdııa baǵasyn salystyrdyq. Tańdaý óte kóp. Keı óńirde tirileı satsa, endi birde tazartyp, túrli dámdeýish qosyp satady. Baǵa da soǵan qaraı ózgerip otyr. Bir ǵana asshaıannyń syraǵa arnalǵany, argentınalyq, muzdatatylǵany, tuzdalǵany, tazartylǵany jáne aýlanǵan kúıi usynylǵany bar. Al shaıan baǵasy kóbine kólemine qaraı ózgerip otyrady.
Sonymen birge arnaıy mázirmen daıyndalǵany jáne tirileı satatyny bolady. Mıdııa kóbine eki túrde satylady. Biri tazarylǵan, ekinshisi aýlanǵan kúıi.
Asshaıannyń arzany kelisine 4 myń teńge. Mundaı baǵany Qyzylorda, Kókshetaý jáne Pavlodardan tabýǵa bolady. Tarazda baǵa sál joǵary. Munda asshaıannyń kelisi 4 160 teńge. Al Almatyda baǵa - 4 490 teńge.
Asshaıan baǵasy Petropavlda (4 725 tg bastalady), Shymkentte (5 400 tg bastalady), Oralda (5 500 tg bastalady) jáne Qostanaıda (5 800 tg bastalady) ortasha. Semeı, Túrkistan, Astana, Óskemen men Taldyqorǵanda asshaıannyń kelisin 6 000-7 000 teńgege satyp alýǵa bolady.
Qaraǵandy men Jezqazǵanda (8 000-9 000 teńgeden bastalady) baǵa Qyzylorda, Kókshetaý men Pavlodarǵa qaraǵanda eki ese joǵary. Asshaıannyń eń qymbaty Aqtóbe qalasynda satylady. Munda kelisi 9 700 teńge jáne odan joǵary.
Teńiz ónimderiniń biri - shaıan. Qazaqstanda shaıan baǵasy 3 000 teńge. Bul baǵaǵa Túrkistanda tiri shaıan satyp alýǵa bolady. Al Astana, Qostanaı, Almaty men Qaraǵandyda baǵa sál joǵary. Kelisi - 3 500 teńge.
Qazaqstannyń keıbir óńirinde (Taldyqorǵan, Petropavl, Kókshetaý, Semeı, Oral, Pavlodar, Taraz, Aqtóbe, Shymkent, Jezqazǵan jáne Óskemen) shaıannyń ortasha baǵasy 4 000 teńgeden bastalyp, 5 000 teńgege jetip tur. Al Qyzylordada shaıannyń kelisi - 8 500 teńge. Bul elimizdegi eń joǵary baǵa.
Taǵy bir teńiz ónimi - mıdııa. Ony elimizdiń barlyq óńirinen taba almaısyz. Eń arzany Petropavl men Pavlodarda. Baǵa kelisine - 3 500 teńge.
Kókshetaýda (4 000 tg), Tarazda (4 100 tg), Aqtóbede (4 500 tg) jáne Oralda (4 800 tg) baǵa ortasha. Sondaı-aq keıbir óńirde mıdııa baǵasy 5-7 myń teńge aralynda. Máselen Qostanaıda (5 000 tg), Almatyda (5 300 tg), Taldyqorǵanda (5 590 tg), Óskemen men Semeıde (6 000 tg), Qaraǵandy men Túrkistanda (6 500 tg) jáne Shymkentte (6 800 tg) baǵa ortasha.
Al eń qymbaty Jezqazǵan (8 000 tg) men Astanada ( 9 725 tg) satylady.
Aıta keteıik, buǵan deıin Qazaqstan qalalarynda keshendi túski as baǵasy týraly jazyldy.