Qazaqstanda tennısten alǵash ret álemdik týrnır ótedi
NUR-SULTAN. QazAqparat – Nur-Sultan qalasynda alǵash ret kásipqoı tennısshiler qaýymdastyǵynyń «Astana Open» ATP 250 týrnıri ótedi, dep habarlaıdy QazAqparat tilshisi.
Qazaqstan tennıs federatsııasy málim etkendeı, álemdik deńgeıdegi jarystyń júlde qory - 275 myń AQSh dollary.
25 qazan – 1 qarasha aralyǵynda ótetin dodaǵa reıtıngte úzdik júzdikke kiretin 60-tan astam tennısshi qatyspaqshy. Solardyń ishinde frantsııalyqtar Benýa Per (26) men Adrıan Mannarıno (39), aýstralııalyq Djon Mıllman (43) jáne basqalar elordaǵa keletinin rastap otyr.
Sondaı-aq Qazaqstannan álemniń 49-raketkasy Aleksandr Býblık, Mıhaıl Kýkýshkın (88), Dmıtrıı Popko (171) syndy elimizdiń betkeustarlary baq synamaqshy.
Qazaqstan tennıs federatsııasynyń prezıdenti Bolat Ótemuratov týrnırdiń joǵary deńgeıde ótetinine senim bildirdi.
Jalpy, ATR 250 álemdik týrnırine jylyna 40 kásibı jarys kiredi. Bıyl koronavırýs indetine baılanysty sonyń 17-si ǵana ótti. Nur-Sultandaǵy doda tennısshilerge ATR reıtınginde 250 upaı alýǵa múmkindik beredi.
Sanıtarlyq-epıdemıologııalyq talaptar saqtala otyryp, oıyndar kórermenderdiń qatysýynsyz, qatań hattama aıasynda ótedi.
Qazaqstannyń birinshi raketkasy A.Býblık týrnırdiń ózderine úırenshikti korttarda ótetinin, munyń eń úzdik alańdardan esh kem túspeıtinin jetkizdi.
Eske sala keteıik, budan buryn Dmıtrıı Popkonyń Barselona týrnırin sátti bastaǵanyn jazǵan bolatynbyz.
D.Popko ekinshi aınalymda álemniń 129-raketkasy, argentınalyq Fakýndo Banıspen kortqa shyǵady.
