Qazaqstanda tennıske negizinen demeýshilik qarjy esebinen qoldaý jasalýda - Bolat Ótemuratov
ASTANA. QazAqparat - Qazaqstanda tennısti damytýǵa negizinen demeýshilik qarjy esebinen qoldaý jasalýda. Bul týraly búgin Astanada ótken baspasóz máslıhatynda Qazaqstan tennıs federatsııasynyń prezıdenti Bolat Ótemuratov málim etti.
«Rafael Nadal men Jo-Vılfrıd Tsonganyń matchyn ótkizý úshin biz demeýshilik qarjyny tarttyq jáne bul baǵytta kommertsııalyq jaqsy jobany júzege asyryp otyrmyz. Jalpy alǵanda, federatsııa tek demeýshilik qarjy esebinen jumys isteýde. Bul turǵyda men ózimniń de jeke qarjymdy jumsap kelemin. Men úshin onyń barlyǵy elimizdiń bolashaǵy men jastar men órenderimizdiń densaýlyǵy úshin áleýmettik ınvestıtsııalar»,-dedi B. Ótemuratov.
Nadal men Tsonga qazaqstandyq jas tennısshilerge sheberlik jattyǵýlaryn kórsetedi.
«Biz Qazaqstannyń barsha óńirinen 500 jas tennısshini shaqyrttyq. Meniń oıymsha, olardyń arasynda halyqaralyq iri týrnırlerdiń bolashaq jeńimpazdary bar jáne bul úzdikterdiń esimin birneshe jyldan keıin estıtin bolamyz»,-dep toqtaldy federatsııa basshysy.
Sonymen qatar B. Ótemuratov Rafael Nadalmen burynnan dos ekendikterin jáne ol Qazaqstanmen bul sport túri boıynsha yntymaqtastyq qarym-qatynasta bolýǵa daıyn ekendigin atap ótti.
Aıta keteıik, búgin keshke Ulttyq tennıs ortalyǵynda álemdik tennıste tanymal oıynshylarynyń biri, Úlken Shlem oıyndarynyń jeke toptyq kezeńderiniń 14 dúrkin jeńimpazy, Olımpıada chempıony Rafael Nadaldiń qatysýymen match ótedi. Osy joldastyq kezdesýde oǵan qarsylas retinde álemniń eń myqty TOP-10-dyǵyna kiretin Jo-Vılfrıda Tsonga shyǵady.
