Qazaqstanda tennıs sportynyń negizin qalaýshy Avgýstın Veltstiń týǵanyna 100 jyl tolýyna oraı týrnır ótedi
ALMATY. QazAqparat - Almatyda Qazaqstandaǵy tennıs sportynyń negizin qalaýshy Avgýstın Veltstiń týǵanyna 100 jyl tolýyna oraı «Velts memorıaly» týrnır ótkizilmek. Bul týraly Qazaqstan Tennıs Federatsııasy habarlady.
Balalar arasynda ótetin halyqaralyq sporttyq saıys 6 qańtarda TsSKA tennıs kortynda bastalady.
Qazaqstan Tennıs Federatsııasynyń shaqyrýymen týrnırge Avgýstın Veltstiń shákirtteri, alys-jaqyn sheteldegi sportshylar, Moldovadan KSRO sport sheberi Rýd Alekseı, Ýkraınadan Mavrodıı men Olga Nıkıtıchnalar, Italııadan Maksımova Lılııa, Izraılden Stavbýnskıı Mıhaıl, sondaı-aq, qazaqstandyq sportshylar, qaıratkerdiń balasy - Velts Vladımır, nemeresi Velts Alısa, Venına Alla, Bashırova Venera, Tkachenko Marına, Kovalev Valerıı, Lıtvınov Valerıı qatysady», - delingen habarlamada.
«Velts memorıaly» balalar týrnıri Almatyda 1991 jyldan beri ótkizilip keledi. Qazaqstan Tennıs Federatsııasy bul ıgi dástúrdi budan ári jalǵastyrmaq.
