Qazaqstanda temirjolmen astyq tasymaldaý 13%-ǵa artty
ASTANA. KAZINFORM – Qazaqstanda 2026 jyldyń segiz aıynda temirjol arqyly 9,3 mln tonna astyq tasymaldandy. Bul ótken jyldyń sáıkes kezeńimen salystyrǵanda 13%-ǵa kóp, dep habarlaıdy Kólik mınıstrligi.
2025 jyldyń qańtar-tamyz aılarynda temirjol arqyly tasymaldanǵan astyq kólemi 8,2 mln tonnany quraǵan.
Jańa egin jınaý naýqanynyń bastalýymen jańa ónim astyǵynyń alǵashqy mıllıon tonnasy tasymaldandy. Bıyl tamyz aıynyń ózinde temirjol arqyly 1,1 mln tonna astyq jetkizilgen. Bul 2025 jyldyń tamyzymen salystyrǵanda 35%-ǵa joǵary.
Eksporttyq tasymalda da ósim baıqalady. Jyl basynan beri temirjol arqyly syrtqy naryqtarǵa 7,2 mln tonna astyq jóneltildi. Byltyr osy kezeńde bul kórsetkish 6,3 mln tonna bolǵan. Osylaısha eksport kólemi 14%-ǵa artty.
– Eksporttyq tasymaldyń negizgi kólemi Ortalyq Azııa elderine tıesili – 4,8 mln tonna. Bul ótken jylǵy kórsetkishten 37%-ǵa joǵary. Ózbekstanǵa 3,6 mln tonna astyq jóneltilip, tasymal kólemi 50%-ǵa, Tájikstanǵa 1 mln tonna jetkizilip, 17%-ǵa artty, – delingen mınıstrlik aqparatynda.
Aýǵanstanǵa eksport kólemi aıtarlyqtaı ósken. Bul elge segiz aıda 655 myń tonna astyq tasymaldandy – ótken jyldyń sáıkes kezeńimen salystyrǵanda 4,4 ese kóp.
Qytaıǵa temirjol arqyly 558 myń tonna astyq jóneltildi. Bul byltyrǵy sáıkes kezeńnen 33%-ǵa artyq.
Astyq tasymalyn turaqty ári ýaqtyly qamtamasyz etý úshin Kólik mınıstrligi astyqty temirjolmen tasymaldaýdy uıymdastyrý jáne úılestirý jónindegi jumys tobyn qurdy.
Jumys toby tasymaldaý úderisine qatysýshylardyń qyzmetin úılestirip, temirjol ınfraqurylymy men vagondar parkiniń artyp kele jatqan tasymal kólemine daıyndyǵyn baqylaıdy.
Sonymen qatar astyqty birkelki tıeýge, vagondardyń qozǵalysyn tıimdi uıymdastyrýǵa jáne olardyń stantsııalarda shamadan tys jınalyp, turyp qalýyna jol bermeýge erekshe nazar aýdarylyp otyr.
Aıta keteıik, elimizde dándi daqyldardyń 61,6%-y jınaldy, 13,5 mln tonna astyq bastyryldy.
