Qazaqstanda temirjol arqyly eksportqa júk tasymaldaý 7,1%-ǵa artty
ASTANA. KAZINFORM – Qazaqstanda bıylǵy toǵyz aıda temirjol arqyly eksportqa 69,4 mln tonna júk tasymaldandy. Bul ótken jyldyń sáıkes kezeńimen salystyrǵanda 7,1%-ǵa kóp, dep habarlaıdy Kólik mınıstrligi.
2026 jyldyń qańtar–qyrkúıek aılarynda eldegi temirjol júk tasymalynyń jalpy kólemi 241,7 mln tonnaǵa jetti. Ótken jyldyń osy kezeńinde bul kórsetkish 233,7 mln tonna bolǵan. Osylaısha, tasymal kólemi 3,4%-ǵa ósken.
Jalpy kórsetkishtiń artýyna eksporttyq tasymaldyń ulǵaıýy yqpal etken. Atap aıtqanda, 2025 jyldyń toǵyz aıynda temirjol arqyly shetelge 64,8 mln tonna júk jóneltilse, bıyl onyń kólemi 69,4 mln tonnaǵa jetti.
Eksport ósimi negizinen temir keni, astyq, tyńaıtqysh, kómir, qurylys materıaldary jáne basqa da ónimderdi tasymaldaý kóleminiń artýymen baılanysty.
– Temir kenin tasymaldaý boıynsha aıtarlyqtaı ósim tirkeldi. Onyń eksporttyq tasymaldaý kólemi 10,1 mln tonnany qurap, 2025 jyldyń sáıkes kezeńimen salystyrǵanda 32,1%-ǵa artty. Astyqtyń eksporttyq tasymaly 17,6%-ǵa ósip, 8,3 mln tonnany qurady. Negizgi ósim Ortalyq Azııa elderine, Aýǵanstanǵa jáne Qytaıǵa baǵyttalǵan tasymaldar boıynsha baıqaldy, – delingen habarlamada.
Sonymen qatar bıylǵy toǵyz aıda temirjol arqyly shetelge 1,2 mln tonna tyńaıtqysh jóneltilgen. Bul ótken jyldyń sáıkes kezeńinen 9%-ǵa joǵary.
Tyńaıtqysh eksportynyń ósýine Belarýs, Brazılııa, Ózbekstan, Bolgarııa jáne Aýǵanstanǵa jóneltiletin ónim kóleminiń artýy áser etken.
Kómir tasymalynda da oń dınamıka baıqalady. Qańtar–qyrkúıek aılarynda temirjol arqyly eksportqa 25,8 mln tonna kómir shyǵarylǵan. Bul 2025 jyldyń sáıkes kezeńimen salystyrǵanda 2,1%-ǵa kóp.
Osylaısha, temirjol arqyly júk eksportynyń ósimi birneshe negizgi taýar toby boıynsha tirkelgen.
Aıta keteıik, buǵan deıin bıylǵy alǵashqy toqsanda temirjol arqyly eksporttyq júk tasymaly 2,2%-ǵa artyp, 23,7 mln tonnaǵa jetkeni habarlanǵan.
