Qazaqstanda temirjol tasymalyna jeke ınvestıtsııa tartý úshin salada sýbsıdııalaý tetigin ózgertý josparlanýda
ASTANA. QazAqparat - Salaǵa jeke ınvestıtsııalardy tartý úshin Qazaqstanda temirjol jolaýshylar tasymalynda sýbsıdııalaý tetikterin ózgertý josparlanyp otyr. Bul týraly búgin Astanada temirjol kóligin damytýǵa arnalǵan keńeste QR IDM Kólik komıteti Temirjol kóligi basqarmasynyń basshysy Nurbek Qabıjan málim etti.
Onyń sózine qaraǵanda, jańa jolaýshylar vagondaryn alý úshin tasymaldaýshylardyń zaemdyq qarjysy esebinen temirjol jolaýshy kóligine ınvestıtsııa tartýdyń tetigin jasaý maqsatynda zańnamaǵa ózgerister engizýdiń qajettigi týyndaýda.
Osyǵan baılanysty birinshi kezekti is-qımyldardyń 2015 jylǵa arnalǵan josparyna sáıkes, ınvestıtsııa tartýdyń quqyqtyq sharttaryn jasaý turǵysynda tıisti zań jobasy ázirlendi.
Atalǵan qujatta jolaýshylardy tasymaldaýdy sýbsıdııalaý tetigine ózgerister engizý men negizgi aktıvterdi jańartýdyń uzaq merzimdi negizdegi normatıvtik-quqyqtyq sharttaryn jasaý qarastyrylǵan.
«Sýbsıdııalaý tetigin ózgertý qarjylandyrýdyń ashyqtyǵyn arttyrady, sondaı-aq tasymaldaýshylarǵa jyl saıyn shamamen 150 jańa vagon satyp alýyna jáne bir jylda 25 mlrd. teńge ınvestıtsııa tartýyna múmkindik ashady», - dedi N. Qabıjan.
