Qazaqstanda temirjol boıynda adam ólimi jıilep ketti
ASTANA. QazAqparat - Qazaqstanda temirjol boıynda adam ólimi jıilep ketti. Bul týraly búgin temirjol boıynda adamdardyń qaýipsizdigin qamtamasyz etýdegi zańdylyqtyń jaı-kúıi máseleleri jónindegi keńes aıasynda BAQ ókilderine suhbat bergen QR Bas kólik prokýratýrasynyń ókili Asqar Ǵalıasqarov málim etti, dep habarlaıdy QazAqparat.
«Jyldan jylǵa temirjol boıynda adamdardyń óndiristik emes jaraqat alý statıstıkasy artyp keledi. Sońǵy 10 jylda 1100-den astam adam jaraqattanyp, onyń 700-i qaza tapty. Ókinishke oraı olardyń arasynda balalar da bar. sońǵy bes jylda 50 bala qaza boldy», - dedi ol.
Onyń aıtýynsha, kóp jaǵdaıda adamdardyń beıqamsyzdyǵynan, temirjol qaýipsizdigi erejelerin saqtamaýdan qaıǵyly jaıttar bolyp jatady.
«Degenmen bul jaǵdaıdy saraptaı kele birqatar ilespe sebepterin anyqtadyq. Olardyń qatarynda eldi mekenge irgeles ýchaskelerde qorshaýlardyń, qaýipsiz ótý úshin kópirlerdiń bolmaýy bar. Qazaqstan temir joly tarapynan da halyqqa júrgiziletin aldyn alý sharalary álsiz», - dedi kólik prokýratýrasynyń ókili.
Asqar Ǵalıasqarovtyń derekterine qaraǵanda, temirjol boıynda adam ólimi respýblıkanyń ońtústiginde, Almaty qalasynda, Almaty oblysy men Qaraǵandyda jıi tirkeledi.
«Biz qaýipti ýchaskelerdi qorshaý jumystaryn jandandyryp, kópirler, jaıaý júrginshi ótkelderin ornatý máselesin qarastyrýdy usynamyz. Halyqpen aldyn alý jumystarynyń birlesken jańa baǵdarlamasy ázirlenetin bolady», - dedi ol.
Aıta keterligi, búgingi kúni elimizde temirjoldyń belgilengen bóliginen ótkeni úshin eskertý jasalyp, ákimshilik aıyppul ǵana salynady.
