Qazaqstanda temirjol bıletteriniń 40 paıyzǵa jýyǵy jalǵan tulǵalar arqyly satylady - B.Dárimbetov

ASTANA. Qarashanyń 25-i. QazAqparat /Gúlmıra Álıakparova/ - Qazaqstanda temirjol bıletteriniń 40 paıyzǵa jýyǵy jalǵan tulǵalar arqyly satylady. Bul týraly búgin ótken baspasóz máslıhatynda «Jolaýshylar tasymaly» AQ basqarma tóraǵasy Baıdaly Dárimbetov málim etti,

dep habarlaıdy QazAqparat.

Basqarma tóraǵasynyń atap ótkenindeı, búginde vokzal ǵımarattarynda memleketke qarasty 301 jáne ǵımarat aýmaǵynan tys taǵy 600-ge jýyq temirjol kassalary jumys isteıdi. El aýmaǵynda memlekettiń quzyryna qarasty - 27, jergilikti atqarý organdaryna qarasty - 94 vokzal bar.

«Búginde «Qazaqstan temir joly» UK» AQ basshylyǵy el aýmaǵynda ornalasqan vokzaldyń barlyǵyn «Vokzal servıs» AQ-nyń qaramaǵyna ótkizý máselesin kóterip jatyr. Sebebi, qazirgi úrdis birtutas tehnologııalyq júıede jumys isteýge múmkindik bermeı otyr», - dedi ol.

Sondaı-aq, onyń aıtýynsha, búginde temirjol bıletteriniń 30-40 paıyzy jalǵan tulǵalar arqyly jasyryn satylady jáne bul máselede atalmysh basqarma dármensiz. «Bıletterdi satýmen jaldanyp alynǵan otbasylar aınalysatynyn bilemiz. Biraq osy másele boıynsha kólik polıtsııasy ustaǵan tulǵalardy, zańnamada jaýapqa tartý qarastyrylmaǵandyqtan, bosatyp jiberýge týra keledi», - dep atap ótti B. Dárimbetov.