Qazaqstanda temirjol arqyly tasymaldanatyn júk kólemi 12 paıyzǵa ósti
ASTANA. QazAqparat - «Qazaqstan temir joly» ulttyq kompanııasy» anktsıonerlik qoǵamynyń segiz aıdaǵy júk tasymalynyń kólemi ótken jyldyń sáıkes merzimimen salystyrǵanda 12 paıyzǵa ósken. Bul týraly ulttyq kompanııanyń baspasóz qyzmeti habarlady.
Baspasóz málimetterine qaraǵanda, jyl basynan beri barlyq negizgi júk túrlerin tıeý kólemi 14,4%-ke artsa, onyń ishinde astyq pen un ónimderi 17%-ke ósken. Astyq pen un ónimderi Ortalyq Azııa, Aýǵanstan, Reseı, Iranǵa jóneltilgen. Eksporttyq tasymal kólemi ótken jyldyń sáıkes merzimimen salystyrǵanda 14%-ke ósti.
Onyń ishinde Qyrǵyzstan (29%), Qytaı (24%) jáne Reseı (15%) temirjoldarynyń áleýetin paıdalaný arqyly eksportqa shyǵarylǵan júk kólemi de kóbeıgen.
2016 jyldyń sáıkes merzimimen salystyrǵanda ımporttyq baǵdardaǵy júkter kólemi de 24%-ke ósti. Kórshiles eldermen shekaralyq Qytaı ( 33%), Reseı ( 23%), Ózbekstan (16%) temirjol ótkelderi arqyly da júk tasymalynyń kólemi artqan.
Sonymen qatar tranzıttik tasymal aýqymy da óskendigi baıqaldy. Negizgi Chendý - Dostyq - Lodz baǵdaryna tranzıttik tasymal kóbeıgen.
Bıylǵy jyldyń segiz aıynda Qytaı- Eýropa- Qytaı baǵdarynda konteınerlik poıyzdar sany eki esege artty. Qazaqstan aýmaǵy arqyly Qytaıdan Eýropaǵa baǵyttalǵan tranzıttik júkterdi tasymaldaý kólemi 1,5 esege kóbeıse, keri qaraı tasymal kólemi eki esege artqan.
Kompanııa qosymsha júkterdi tartý maqsatynda Qazaqstan aýmaǵy arqyly ótetin tranzıttik júkterge tarıftik jeńildikter jasaýda. Onyń ishinde qara metall, tyńaıtqysh, maqta, qant qyzylshasy, ken ónimderi, tústi metall, jemis-jıdek pen munaı ónimderine jeńildik qarastyrylǵan.
Onyń syrtynda, óndiris tıimdiligin kóterý, ońtaılandyrý, kólik kesheni qyzmetin toqtaýsyz júrgizý úshin keshendi sharalar atqarylýda.
