Qazaqstanda temir joldy belgilenbegen jerden kesip ótkeni úshin 6 myńnan astam adamǵa aıyppul salyndy
ASTANA. QazAqparat - Aǵymdaǵy jyldyń úsh aıynda Kóliktegi ІІD Ákimshilik polıtsııa basqarmasynyń qyzmetkerleri temir joldy belgilenbegen jerden kesip ótkenderi úshin 6395 azamatty ákimshilik jaýapkershilikke tartty. Bul týraly vedomstvonyń baspasóz qyzmeti habarlady.
«Ókinishke oraı, ata-analardyń baqylaýynan tys qalǵan balalar kóp rette oqys jaǵdaıǵa ushyrap jatady. Kólik saqshylary óz kezeginde, mundaı oqıǵalardyń aldyn alýǵa baǵyttalǵan sharalardy udaıy júrgizip keledi. Ákimshilik shara qabyldap, sonyń ishinde, óz ómirleri men densaýlyqtaryna nemquraıly qaraǵan azamattardy, balalarynyń qaýipti aımaqta úlkenderdiń baqylaýynsyz júrgenderi úshin ata-analardy jaýapkershilikke tartady», - dedi Kóliktegi ІІD Ákimshilik polıtsııa basqarmasynyń aǵa ınspektory polıtsııa podpolkovnıgi Gúlnár Qarsultanova.
Onyń málimetinshe, 2014 jyldyń І toqsanynda Kóliktegi ІІD qyzmet kórsetý aýmaǵynda temir jol kólik nysandarynda balalar jaraqattanýynyń (jolaýshy poezynyń 2-sóresinen qulaý, qaınaǵan sýǵa kúıip qalý, temir joldy belgilenbegen jerden ótý erejesin buzý) 12 faktisi tirkeldi. Sonymen qatar, kámeletke tolmaǵan jasóspirimderdiń jyljymaly quramnyń soǵyp ketýiniń saldarynan qaıtys bolýyna baılanysty 2 fakti tirkeldi.
